Recientemente Aruba Hotel and Tourism Association a bishita e proyecto hotel nobo Hyatt Place, situa net banda di Aeropuerto Internacional Reina Beatrix. E desaroyadornan ta planea pa habri e hotel na augustus proximo, pues aki 4 luna di tempo. E bon noticia….a nombra un ehecutivo Arubiano na cabes di e hotel!
Despues di un proceso di reclutacion y seleccion, Hyatt Regency na nivel internacional a scoge Marta Raven, cu a traha e ultimo añanan na Hyatt Regency Aruba, como e General Manager di e hotel nobo. E lo bira un “Airport Hotel” pues destina pa estadianan cortico y pa e mercado local, hopi biaha enfoca riba biahenan di negoshi.
Den e siguiente simannan lo suministra mas informacion riba desaroyo di e proyecto. Bale la pena menciona si cu un otro Arubiano ta haya oportunidad pa ocupa e puesto maximo na un hotel riba nos isla. E ta tipifica e caminda largo di educacion, gana experiencia y gana confiansa cu nos hendenan a pasa dor di dje pa demostra cu “nos mes por”.
Den pasado nos a conoce Arubianonan caba na cabes di hotelnan, manera Jan van Nes, Astrid Muller y algun mas. Awendia nos tin Paul Gielen den e funcion di General Manager di Renaissance Aruba Resort & Casino. Por menciona cu ambos Stellaris Casino na Marriott y e casino na Ritz Carlton, ambos tambe tin un Arubiano na cabes.
Pabien na Marta Raven cu e anuncio di su postulacion como General Manager ma Hyatt Place Airport Hotel.
