Diahuebs den oranan di mainta Corte na Groningen a trata e caso penal Pro Forma contra e Arubiano sospechoso Milton T. E acusacion contra dje ta cu el a hinca un jogger den e area di Jaagpad Groningen.
Milton durante su presentacion den Corte diahuebs mainta a sigui nenga di ta envolvi den e caso aki, unda cu a mata e homber Hidde Bergman (27) riba diamars, 14 di mei ultimo. Esaki tabata su prome presentacion na Corte pa e caso aki.
Supuestamente e acusado di 26 aña a hinca e jogger di 27 aña den su lomba riba Jaagpad, un area na unda e victima tabata biba. El a fayece na e sitio mes. E Arubiano sinembargo a keda deteni te cu 10 di juni y pa puro casualidad, si mester lesa loke ta para den e procesverbaal. OM ta papia di asesinato.
Te dia di awe no a haya e arma uza den e crimen aki, cu excepcion di e “hoesje” di e arma blanco aki, cual tabata na suela cerca di e victima. Riba e “hoesje” aki a haya DNA di Milton T. Den camber di T. Na Groningen a haya un schrift den cual, segun Polis, T. A skirbi cu el a mata un hende. “Mi no ta compronde di con mi ta un sospechoso,” tabata reaccion di e acusado. “Mi no a mata y mi ta inocente.”
Durante e sesion Pro Forma di diahuebs mainta, no a trata e caso profundamente. Esaki lo tuma luga te na inicio di 2020, segun OM ta calcula. Prome mester interna e acusado den Pieter Baan Centrum pa pasa den un evaluacion psikico, pero tambe mester scucha testigo y e celular di T. mester wordo investiga.
Ta inocente
Den un declaracion cu e tata a duna na un corant Hulandes, e ta insisti cu su yiu ta inocente. “E ta bisa cu e no a haci nada. Y mi ta kere,” segun e atata Albert. E ta conta cu su yiu tambe ta un jogger y regularmente ta haci ehercicio riba Jaagpad. E acusado y e victima no conoce otro.
E no sa si su yiu tabata na e sitio na momento di e sucedido, pero loke si e sa ta cu e señora testigo kende a a bisa di a mira e acusado na e sitio, a hala su declaracion aden. E no por corda ta ki dia el a mir’e eynan.”
Studiante
Nan ta conta den e articulo cu Milton a ance y biba na Aruba te ora cu el a muda pa Hulanda cinco aña pasa pa sigui cu su estudionan avanza, estableciendo su mes na Heerlen. El a cambia diferente biaha di estudio te ora cu el a bay Groningen pa studia ley. E hoben, segun e tata, tabata bayendo bon. E ta biba di su financiamento di estudio y e mes tabata mand’e placa tur luna. Henter luna di maart, prome cu e hecho, e tabata na Aruba.
Detencion
A hiba Milton dia 8 di juni warda riba sospecho di destruccion di un auto. Polis a constata durante interogacion e homber a aparece como posibel sospechoso di e caso di hincamento. Dia 10 di juni el a keda deteni. Su compañeronan ta describie como un solitario. Ta papia Hulandes malo, ta huma basta, y hopi biaha tin problema financiero. Un compañero tabatin problema cun’e pasobra “Milton no ta compronde cu e no por uza mi weanan”.
E tata a bisa tambe cu e yiu ta malo y tin problema pa hala rosea y guli. E mama mes no por a bishit’e siman pasa pasobra e tabata basta malo.
E investigacion ta bayendo slow y no a haya e arma mes ainda. OM no kier a bisa mucho, solamente cu T. ta cooperando cu e investigacion, pero ki mes el a declara no ta bisa nada.
