Arubiano a fayece den accidente di trafico na Hulanda

Diabierna mainta tempran tabatin un accidente cu dos persona herida den ciudad cu yama Klimmen na Hulanda.
E informe cu Polis a duna ta cu un auto a bay dal den un poste di luz.

Tabata trata di un accidente unda cu tabatin solamente un auto envolvi den cual dos persona masculino a resulta herida. E hecho aki a tuma luga den oranan tempran di diabierna mainta, rond di 5.20, probablemente nan tabata na caminda pa trabou.
E chauffeur tabata coriendo riba Putterweg, ora cu a perde control y a dal contra un poste di luz. E chauffeur tabata un hende homber di 30 aña, kende ambulance a hiba hospital pa examinacion. E ocupante, segun Polis, a sufri lesionnan basta serio y a wordo transporta pa hospital na Maastricht.
Den oranan di merdia aki na Aruba a drenta e noticia cu un di e personanan den e auto, esta Giovanni Croes di 30 aña a fayece a consecuencia di e lesionnan ricibi. Giovanni ta sobrino di ex Parlamentario Donny Rasmijn. E ta yiu di Lila Rasmijn y Frenk Croes.

Segun bosero di Polis, no ta conoci si alcohol a hunga un rol. “Tur esey ta wordo investiga.” E caminda a keda cera basta rato pa investigacion.
Na famia y amigonan di e fayecido ta bay palabranan di condolencia.