Aruban Warrios ta sigui bisa NO na Secret Beach Resort

Siman pasa  Aruban Warriors un biaha mas a protesta contra e hotel Secrets na Sero Colorado. “Nos tabata algun warriors muhe cu a bin pa demostra nos preocupacion pa nos tera. Algun mucha homber jong tambe a join nos protesta despues,” ta loke cu Helen Croes, kende ta e lider, a expresa.

Esaki a sosode net na momento cu e ceremonia di groundbreaking tabata tumando luga. “Pabou di nos bou tent gobierno di coalicion cu Prome Minister AEvelyn Wever Croes,  e dos Odubernan y Parlamento tabata festeha e groundbreaking di Secrets hunto cu e Spaño y Venezolanonan. Un di nos a comenta cu door cu tur cos ta gratis tin tanto hende eynan. Y un di e mucha hombernan jong cu a join nos a remarca: “NO, boso ta fout, esaki no ta gratis pero ta nos ta paga p’e.”

Croes ta bisa di ta impresiona con tin hendenan hoben toch cu pensamentonan asina. E expresion, el a bisa, ta ilustra con hubentud ta pensa tocante e landgrabbing aki na Aruba. Pero tambe e tabata sorprendi cu na momento cu nan tabata haciendo demostracion pacifico, a manda Polis pa nan. “Un dado momento hasta polis a wordo manda pa bin puntra nos si nos lo bay busca problema n’e tentnan. Polis a comporta nan mes bon. Pero asina bobo PM y coalicion ta cu nan no sa cu derecho di protesta ta ancra den nos constitucion???Asina sushi nan consenshi ta cu nan tin miedo di 4 muhe Arubiano y 2 mucha homber? “

Apesar cu e fiesta e inauguracion di e proyecto, Croes tin un ultimo mensahe: “Dia 14 di november coalicion y parlamento a fiesta pero pronto nan lo yora malai.”