Mi mester confesa cu ami nunca a tende di e grupo Serenada di Corsow. Tal bes ta pasobra mi tabata biba leu di aki pa hopi aña, pero danki na Internet mi por a haya hopi informacion di e grupo y mi a namora di nan.
Esta un joya musical!. Segun nan website, e “grupo a wordo forma na 1975 ora cu un grupo ‘rock’ a uni cu un coro i hobennan di kerki di hoben. Supuestamente ya na cuminsamento e grupo a ‘experimenta’ cu stilonan musical, cu ritmonan y harmonizacion di bosnan, mientras cu nan tabata ta lucha pa conserva e esencia di e legado colorido musical di Corsow cu su ritmo tipico y canticanan alegre”.
Asina por lesa hopi mas, pero pa haya smaak di e bolo, mester com’e, y pa aprecia e balor musical di Serenada mester scucha algun di e cantidad di disconan cu nan a graba. Y esaki ami a haci. Mi ta urgi tur cu kier sa mas di Serenada pa bay nan Website y busca algun di nan obranan. Mihor ainda, mi ta urgi tur cu ta lesa esaki pa percura pa asisti e concierto di diasabra anochi na Cas di Cultura.
No a strañami di lesa cu Serenada a representa Corsow internacionalmente na asina hopi pais pa asina tanto tempo. Tampoco a strañami cu e director, Sr. Henri Moen a recibi e premio “Cola Debrot” pa su dedicacion a e grupo. Nan ta bon!
Mi ta hopi gradici na e directiva di Arubaanse Kunstkring cu a logra haya e grupo Serenada bin deleita nos cu nan presentacion unico di musica y folklore di nos isla ruman.
E entrada pa e concierto ta costa Awg. 25.00. Prome cu e concierto por cumpra tiketenan na DeWit en van Dorp Stores, na Plaza Bookshop y na Cas di Cultura. E anochi di concierto por cumpra nan na e sala di concierto. Ban topa na Cas di Cultura diasabra anochi y goza di e concierto di e grupo Serenada di Corsow.
