Aruba tin un mucha di 6 aña cu Coronavirus

16418

Awe Gobierno a confirma cu den e ultimo tres casonan confirma cu Coronavirus, tin un mucha di apenas 6 aña di edad. Esey ta haci cu e edad minimo cu tabata 11 aña, a baha te na 6 aña mientras cu e edad maximo te ainda ta na 74 aña di edad. Cu esaki, e pensamento cu muchanan no ta den risico pa contagia cu e virus, no necesariamente ta berdad. 

Na Merca nan a raporta cu casonan di muchanan contagia tipicamente ta casonan limita y e sintomanan ta casi no existente, pues masha leve, asina Centers for Disease Controls and Prevention a duna di conoce ayera.

Sinembargo, a tuma nota di algun caso di muchanan cu a contagia cu Coronavirus y cu nan condicion di salud a deteriora y bay atras di tal forma cu nan situacion a bira hopi serio y hasta preocupante. Di e casonan aki, tres mucha a fayece recientemente na Merca.

Minister Dangui Oduber awe merdia durante e Conferencia di Prensa di Gobierno hunto cu DVG y otro instancianan combatiendo Coronavirus.

Ta bon pa informa cu muchanan ta representa menos cu 2% di e casonan confirma na Merca, di acuerdo cu CDC’s Morbidity and Mortality Weekly Report. Den dicho rapport a analisa 149,760 caso di Covid-19 confirma den laboratorio na Merca entre 12 di februari y 2 di april. Di e casonan aki, solamente 2,572 tabata di muchanan bou di 18 aña, pues ta representa apenas 1.7% di e total.