Den un carta cu un tono di instruccion, serio y determina, Gobierno di Hulanda a informa Prome Minister Evelyn Wever-Croes cu di awo padilanti ta escala e comunicacion cune y no ta atende mas cu Minister Xiomara Ruiz-Maduro di Finansas, Asuntonan Economico y Cultura. Den e carta a duna Gobierno di Aruba un luna di tempo pa cumpli cu tur locual Gabinete Wever-Croes mes a firma den e protocol na november 2018 relaciona cu presupuesto 2019. Si no cumpli lo tuma medidanan contra Aruba cu lo wordo determina den Conseho di Minister di Reino Hulandes y lo por spera e mesun situacion cu Corsou, caminda cu Hulanda den cierto forma ta pone e Minister di Finansas bou di curatela y ta tuma maneho di e pais over.
E contenido di e carta, cu ainda no ta publico, ta instrui Gobierno di Aruba pa cumpli cu locual a acorda, dor di bay bek Parlamento awor den reces ainda y cambia e Presupuesto 2019 na e realidad di awendia. Den esey lo mester contene cumplimento cu entradanan di Gobierno dor di por ehempel aumenta BBO.
Di otro banda Hulanda ta subraya cu e problemanan di Aruba no ta solamente aumenta entradanan di Gobierno, sino mester baha gastonan tambe. Den esey a acorda cu e presupuesto di personal tin un blafon di 479 miyon florin pa e aña aki. Sinembargo, Gobierno di Aruba a purba “hunga sabi” cu Hulanda excluyendo e presupuesto di entre otro e Sociaal Crisis Plan. Eyden ta tumando yen di hende na trabou sin tin un plan concreto di e impacto riba mehoracion di nos situacion social. Hulanda recientemente a avisa Gobierno caba di e forma robes di interpreta e protocol, pero awor a pone riba papel den forma cla!
Pa logra tur locual Hulanda ta desea di mira pa remedia e situacion financiero di pais Aruba, mester pensa pa aumenta BBO cu awor ta na 6%, introduci Sugar Tax den forma urgente (pa logra cobra mas o menos 18 miyon florin) y mester baha gasto di personal, cortando mas cu 300 trahado. Probablemente Hulanda lo ta referi na e 300 coordinadornan y ultimo hendenan cu Gobierno a emplea den 2018 y 2019, hopi cu contract. Lo mester aplica “last in – first out”. Aunke a anuncia un paro riba tumamento di personal, nos por a compronde cu Ministernan ta sigui yena e aparato gubernamental cu hende, unda no a pidi, no tin mester y no tin presupuesto tampoco pa paga.
Gobierno di Aruba sinembargo ta keto, no ta transparente at all den nan modus operandi y ta parce di kier tapa e berdad. Minister di Finansas ta supuestamente cu vakantie, ta celebrando su di dos lustro den politica y lo atende solamente asuntonan urgente, entre otro riba Facebook, sin por duna informacion concreto di e decisionnan necesario cu e lo mester tuma pa salba nos pais.
Parlamento ta cu reces y varios Parlamentario no ta ni na Aruba. Ta dunando e impresion cu tur hende ta sinta man crusa of a hinca cabes den tera sperando horcan, sin cu por nota preparacionnan andando pa toch cumpli den e tempo stipula.
Alcontrario, Ministernan ta sigui anuncia proyectonan, ta cumpra mas auto, ta biaha rond mundo y hasta kier pusha pa bin cu un proyecto ambicioso di un “incinerator” pa procesa sushi, na balor di mey biyon florin!
Esunnan cu tin conocemento di e materia a conseha nos pa gosa di e vakantie aki, pasobra asina e pasa, ta medidanan tras di otro Gobierno lo pasa contra pueblo, pa por cumpli cu e protocol acorda. Di e forma aki Gabinete Wever-Croes a hinca su mes awo den un caminda sin salida cu tanto den cas mes como tambe na Hulanda. E promesa di campaña cu “nos lo sanea e situacion financiero SIN MEDIDA, pasobra nos a studia e materia y conoce e materia y lo goberna sin miedo” parce di no ta aplicabel mas y a keda den historia como un promesa falso di campaña!
