Diamars merdia, lider di fraccion di partido MAS, drs. Marisol Lopez-Tromp a duna declaracion tocante e comportacion di minister y parlamentario di coalicion durante siman y e siman aki. Lopez-Tromp a lamenta di constata cu e prioridad di e mandatario y representantenan di pueblo ta robes, mientras cu el a pidi tur minister duna cuenta di e contractnan di personal cu nan tin bou di nan cartera.
E parlamentario di MAS a cuminsa na reitera cu tur dia tabata presente haciendo su trabou den parlamento. A splica cu unda cu bo ta den e edificio, bo por scucha y sigui e reunion door di e sistema di zonido. “Te hasta den WC bo por sigui e reunion.” El a comenta den reaccion na e ponencia di coalicion cu oposicion no a presenta na trabou henter siman pasa.
Lopez-Tromp: “E ta varia di insulto riba entre otro, famia, mentira, cosnan riba cada un di nos, insinuacion, incluso di minister president. Un nivel nul komma nul, di beerput caminda ta lansa acusacion riba kico cada ken a firma pa come comosifuera esey ta nos prioridad aki den Parlamento.” E paralmentario a sigui indica cu e motibo real di e argumento di cuminda ta simplemente pa kita atencion di trata e topiconan cu berdaderamente tin cu trata.
