Den fin di siman a tuma luga un ceremonia special, caminda cu Aruba Taekwondo Bond a entrega un total di diesseis certificado na e atletanan di diferente scol rond di Aruba. Moises Fernandez ta presidente di e asociacion, el a conta cu e examen di eerste, tweede y hasta vijfde dan a tuma luga aña pasa den luna di december pero debi na contra tempo; no a a ricibi e certificadonan na ora. E certificadonan ta bin for di South Korea, unda e federacion mama di taekwondo, esta; Kukkiwon ta situa.
E participantenan por ta sigura cu e black belt ta uno original y reconoci pa e Kukkiwon. Kukkiwon ta supervisa tur organisacion di taekwondo rond mundo. E atletanan cu a ricibi certificado ta pertenece na cuater scol di taekwondo rond di nos isla.
E proximo paso cu lo tuma luga ta e examen pa fin di aña. Aruba Taekwondo Bond ta organisa anualmente dos examen pa aña. Fernandez a conta tambe cu ta mirando un interes grandi pa cu taekwondo na Aruba. Tin hopi scol di taekwondo rond di nos isla, practicamente den tur districto tin un scol, pa cual ta hacie mas facil pa esunnan interesa pa join. Cu aña escolar nobo, ta motiva tur hoben cu no ta practicando un deporta pa considera taekwondo. E atletanan di taekwondo regularmente ta bay den exterior pa representa nos isla den taekwondo.
