Den e siman aki Aruba Ports Authority ta prepara pa ricibi 10 barco crucero. Dialuna tabata keto den waf pero awe diamars mainta a yega Celebrity Silhoutte y ta ancra te anochi. Mañan diaranson lo ta un dia hopi druk pa Aruba ora cu tin tres barco grandi mara den waf for di mainta tempran. Ta trata aki di Monarch, Freedom of the Seas y Rotterdam.
Monarch lo bandona Aruba basta tempran sigui pa Rotterdam den oranan tempran di atardi mientras cu Freedom of the Seas ta keda den oranan laat na Aruba, permitiendo pasaheronan pa disfruta un poco di e ambiente nocturno na Aruba.
Diahuebs ta yega Navigator of The Seas, e unico barco den waf, mescos cu ta e caso pa diabierna cu e bishita di Prinsendam. Diasabra si lo ta un dia druk na Playa cu tres barco crucero grandi bishitando. Ta Windstar, Aida Parla y Zuiderdam y lo cera e siman diadomingo cu Koningsdam.
Cifranan cu APA ta dispone di dje ta mustra cu luna di januari a resulta miho cu aña pasa. Apesar cu Aruba a ricibi un barco crucero menos cu na 2018 ora cu 52 crucero a mara den haf, por nota cu e barconan tabata mucho mas grandi. Apesar di e diferencia di un barco, e cantidad di pasaheronan tabata mucho mas.
Na januari 2018 a ricibi 53 barco cu ta representa 108.298 pasahero hunto cu 42.822 miembro di tripulacion, compara cu e 52 barconan di januari, 2019, cu a percura pa 128.425 pasahero mas 48.715 tripulante.
APA ta contento cu e cifranan inicial ya ta indica con resultado di aña 2019 lo bay ta.
