Minister di Turismo y Salud Publico Dangui Oduber su meta y vision ta pa sigui innova y haci uzo di tecnologia moderno p’asina facilita servicio y procesonan pa nos biaheronan cu ta bishita Aruba.
E industria di biahe rond mundo ta transformando p’asina facilita e procesonan di biahe door di implementacion di tecnologia. Aruba no ta keda atras y asina awe Aruba ta bay tin un sistema di “facial recognition” y Digital Travel Credentials p’asina verifica e pasahero su identidad ora di drenta y sali di Aruba, cual ta bay duna un servicio unico y rapido pa nos bishitantenan.
Aruba por ta orguyoso pa ta e prome den Caribe pa cuminsa cu un plataforma digital y conhunto cu nos partnernan; SITA, Indicio, Inmigracion di Aruba, Aruba Tourism Authority, nos ta premira cu pa fin di 2024 lo por haci uzo di e sistema AHOP aki na Aruba.
Aruba a cuminsa e proyecto aki na aña 2022. Dia 5 di November 2023, a lansa un programa piloto unda a demostra con e biaheronan por demostra nan informacion via un sistema di Facial Recognitiony Digital Travel Credentials (DTC).
Informacion ta keda warda den e biahero su telefon mobil y e biahero lo duna consentimento pa comparti su informacion cu inmigracion di Aruba, sin ningun retencion di informacion den e database di cualkier tercer partner. Ora yega Aruba, e sistema di inmigracion lo uza control biometrico pa completa e proceso di control di frontera. Asina’ki e biaheronan por pasa den un proceso rapido via un “E-Gate Machine” y esaki ta verifica tur e credentialnan conforme cu inmigracion su rekisitonan.
E proyecto aki a ser reconoci como e prome na mundo, segundo cu documentacion di Aruba su prome video. Te awe, mas cu 500 biahero a pidi pa participa den e programa piloto. Aruba ta riba e caminda pa implemeta AHOP pa entrada y salida di nos isla pa fin di aña 2024.
Aruba ta yama Curacao Bon Bini pa mustra interes tambe den un proyecto similar di biahe cu credencial, pasobra e ta alinia cu e direccion di evolucion di e industria di biahe. Sinembargo, Aruba ta enfatisa e importancia di tin un metodo sistemático, cu ta traha hunto, denter di e islanan.
Aruba ta spera pa mantene su liderazgo den e area aki y duna un danki na tur biahero cu a participa na e proyecto y cu a haya oportunidad pa experiencia e conveniencia di biahe aki cu Aruba ta ofrece.
Minister Dangui Oduber sigur ta orguyoso cu e proyecto di “Aruba One Happy Pass” ta birando un realidad. Aruba un biaha mas lo ta un “trendsetter” y lider den innovacion den Caribe. Biaheronan pa Queen Beatrix Airport pronto ta bay haci uzo di un tecnnologia avansa cu ta bay pone Aruba como pionero den innovacion y esaki ta un progreso pa henter e industria di turismo y hospitalidad. Minister Oduber semper a kere den innovacion y ta opta pa sigui desaroya ariba solucionnan y colaboracion pa keda mehora nos producto Aruba.
