Aruba ta haya aporte di Union Europeo di fondo di 10 miyon pero no sa cuanto

1444

Miembro di Comision Europeo ta confirma e aporte financiero di Union Europeo (EU) pa Aruba relaciona cu e crisis di COVID-19. E siman aki Gobierno di Aruba a ricibi un carta (copia adhunto) di Jutta Urpilainen –  Miembro di Comision Europeo directamente encarga cu e relacionnan entre EU y e 25 paisnan miembro di OCTA- Association of Overseas Countries and Territories of the European Union.

Dia 24 di april 2020 Gobierno di Aruba a dirigi un carta pa Commissioner Urpilainen caminda cu Prome Minister di Aruba ta enfatisa e impacto severo di e COVID-19 crisis riba e economia di Aruba y e pasonan urgente cu Gobierno a tuma pa mitiga e efectonan di e crisis.  Tambe Premier Wever-Croes a elabora riba e pasonan pro-activo pa baha gastonan operacional di  Gobierno di Aruba pa por apela tambe na Hulanda como e “member state” corespondiente di EU pa aporte financiero.

E carta di Comision Europeo ta confirma cu en bista di e emergencia relaciona cu e COVID-19 crisis EU a adopta “exceptional flexibility rules” pa asina Aruba por yega na aporte financiero di un manera lihe, adapta y practico.

Por ultimo Premier Wever-Croes a expresa e aporte di parti di Aruba pa cu e resolucion di Parlamentario Europeo, Samira Rafaela, kende a apela na EU pa crea un “dedicated exceptional support fund” pa e paisnan miembro di OCTA. Pa esaki Comision Europeo ta evaluando e posibilidadnan segun e structura financiero di EU.

Den corto, den margen di e structura financiero vigente cu ta termina fin di aña 2020 Aruba lo ricibi apoyo financiero for di diferente programa existente, incluyendo parti di e suma di € 10 miyon cu lo wordo reparti entre diferente pais miembro di OCTA. 

Eddy Paris como representante di Aruba na EU y Vice-Voorzitter di OCTA ta coordinando e esfuersonan aki na Brussels y cu DEACI (Department of Economic Affairs, Commerce and Industry) na Aruba pa asina e fondonan aki por yega directamente na diferente NGOs na Aruba.