Aruba ta habri siman cu 7 caso mas di Coronavirus

3794

Un rato pasa Gobierno di Aruba a informa riba e website oficial di Coronavirus na Aruba, cu e cantidad di casonan confirma a subi di 64 pa 71! E casonan negativo a alcansa 838 caso, tin 0 morto y contrario na tur e otro simannan, awor e cantidad di casonan recupera a crece di 1 pa 2 caso. Tin 1 caso pendiente y tin 381 persona total den cuarentena na nan cas. Ta bon pa menciona cu entotal a test 910 persona te cu awor na Aruba, un di e cifranan mas halto den henter nos region.

Despues cu den fin di siman no tabati mucho cambio, dialuna a habri cu un aumento significante di casonan na Aruba. Gobierno a menciona na mas di un ocasion cu ta haciendo testnan proactivamente, cu ta conduci cu e cantidad ta crece. Departamento di Salud Publico ta bisa cu e maneho ta precisamente pa test mas hende y ta haya sa ken ta infecta pa por cuida esunnan vulnerabel rond di nan y pa garantisa cu pocopoco henter nos isla ta bira imuun contra e virus.

Na Corsou entretanto a raporta cu nan tin solamente 13 caso, nan si tin 5 pashent cu a recupera di e virus y nan tin 1 solo morto.