Diaranson mainta a tuma luga e despedida di ex-minister di husticia Rudy Croes. Ya for di trempan e procesion a pasa varios caminda, unda cu su famia y su amigonan di mas cerca a rindi homenahe na dje.
Un di e luganan cu a pasa tabata na Bestuurskantoor, ricibi pa un multitud grandi di persona.
For di 12:00 pm pueblo por a bin tuma su despedida na Misa Inmaculada Concepcion pa despues pa 4:00 pm e response a tuma luga, pa e ora sali cu e difunto pa su ultimo luga di sosiego den Santana Catolico na Santa Cruz.
BALUARTE
Rudy Croes tabata co-fundado y baluarte Arubiano cu a nace dia 5 di september 1946.
Rudy Croes tabata para na cuna di fundacion di MEP na 1971. Na 1989 Rudy a aparece pa prome bes riba lista di MEP y den e eleccion di 6 di januari 1989 el a aparece como number 5 obteniendo 4707 voto. E tempo ey Rudy a dicidi di no acepta e funcion di ministro ya cu e kier a bay parlamento prome pa haya experiencia. El a keda como parlamentario y lider interino di fraccion MEP for di 1989 te 1993. Despues di e eleccion na 1993 Rudy a asumi e encargo di Ministro di Husticia y Deporte y esaki te 1994. Entre 1996 y 1998 el a fungi como Presidente di MEP. Entre 1994-2001 e tabata miembro di Parlamento y tambe Presidente di Parlamento. Entre 2001 pa 2009 el a ocupa e funcion di Ministro di Husticia. Tambe Rudy tabata e prome Arubiano cu a fungi como Vice presidente di COPPPAL y na 2005 el a ser honra cu e titulo di ‘Doutor Honoris Causa” pa e Facultad European Brazil.
Como Ministro di Husticia Rudy a logra hopi proyecto na bienestar di nos comunidad: Wardacosta (Kustwacht), Cuerpo Policial Aruba den 4 districto policial, construccion Centro di Husticia na Santa Cruz y Warda di Polis na Noord, Institucion di Guarda Nos Costa (GNC), Helicopter di Polis, Radarnan Raytheon, Flexteam, Visibility Teams, Moles (aparato cu ta busca hende, droga y arma), Night vizors (pa wak leu den scuridad), sistema ultra moderno di Radex, IASA pa promove cu GNC, Inmigracion y Radar ta traha hunto den combatimento di ilegalidad.
Rudy Croes ta laga atras su casa Damia Croes-Arends y su yiunan Daphne Dione Croes, Emmanuel Reu Croes, Francisco ‘Beto’ Croes y Rudolfo ‘Ofo’ Croes.
