Aruba ta anfitrion di “CONCACAF Under-15 Boys’ Championship League B”

Arubaanse Voetbal Bond (AVB) a tene un rueda di prensa pa asina anuncia e “CONCACAF Under-15 Boys’ Championship.” AVB ta orguyoso di por ta un di e tres paisnan scogi como anfitrion di “CONCACAF Under-15 Boys’ Championship League B” di 4 pa 10 di augustus 2025. E torneo reconoci aki ta un di esunnan di mas importante riba nivel internacional den nos region. Lo mira 16 pais competi contra otro, parti den 4 grupo di 4 pais. Aruba ta forma parti di e grupo unda lo enfrenta Jamaica, Corsou y Belize.

Minister di Deporte, mr. Gerlien Croes, a expresa di tabata contento pa forma parti di e anuncio importante di e competencia di futbol U15 mucha homber di CONCACAF y e desaroyo di deporte na Aruba. E mandatario a expresa cu e anuncio aki tabata uno importante pasobra entrante dialuna, 4 di augustus, Aruba ta carga nomber halto ya cu ta anfitrion p’e campeonato “CONCACAF Under-15 Boys’ Championship.”

Ta haci uzo di dos stadion cual ta Guillermo Prospero Trinidad, Dakota, y Jose ‘Buchi Panama’ Wever, veld di Yara. Esaki ta stap grandi pa Aruba cu AVB ta realisando pa haci esaki posibel.

Harvey Clement, representante di AVB, a indica cu nan tin un trabou grandi ta haciendo. El a gradici gobierno y tur otro stakeholder cu ta forma parti di e proyecto grandi aki. P’e wega di Aruba, tin carchi obtenibel. Ta haya esaki na porta y ta costa cinco florin pa tanto adulto como mucha.

Gina Chirino, AVB Women’s Coordinator, a splica cu diesseis seleccion ta competi di cual desde diasabra ta cuminsa yega, sinembargo e parti mas logistico a cuminsa yega Aruba. E team di CONCACAF ta na Aruba y diaranson nan a pasa inspecciona e dos veldnan. A splica cu nan ta enfoca riba siguridad di e hungadonan, cual nan ta haciendo esey den e ultimo añanan. Como e parti logistica ta importante, e team di CONCACAF a hasta bay controla e hotelnan pa mira cu tur cos ta cuadra cu ‘safe guarding.’ E torneo ta parti den cuater grupo, cual ocho (grupo E y F) ta bay hunga na Yara y ocho (grupo C y D) na Dakota.

Steve Escalona, team manager Seleccion U-15 Boys, a splica cu e torneo aki ta hopi grandi pa U-15 Boyes. E preparacion ta di basta tempo caba, aña pasa e seleccion a competi den CFU, esta un pre torneo di preparacion di e seleccion aki. El a expresa cu AVB ta contento cu Aruba por ta anfitrion di e torneo aki

Dreyer Bracho, coach Team U-15, a splica cu pa ocho luna nan ta den preparacion intenso. Nan ta bayendo cu diesocho hungado, di cual cinco di nan ta di Hulanda. E seleccion tabata train cuater bes pa siman. Siman pasa nan por a finalisa e parti di preparacion. Nan a bay Boneiro tres dia pa wega di fogeo, unda nan a gana y perde. Esaki tabata un oportunidad pa nan por a mira con prepara e hungadonan ta pero tambe unda mas mester drecha.

E torneo ta na cas, pero no ta organisa pa AVB pero CONCACAF. E ta pidi pa tur hende yega stadion di Dakota pa apoya e seleccion di Aruba.

Born de Nobrega, capitan di seleccion, a hunga internacionalmente caba, pero esaki ta prome bes cu e ta hunga na cas. De Nobrega a expresa di tin un sentimento hopi bon. Como e wega ta na cas, esaki ta trece mas speransa pasobra nan amistadnan por apoya nan. E ta haya cu nan mester representa Aruba.

Un palabra cu el a manda pa su compañeronan di seleccion ta pa nan saca cara, pasobra ta un biaha so por experencia CONCACAF U-15.

E formato di e torneo ta lo siguiente:

·         Cada pais ta hunga 3 “group stage matches (round-robin).”
·         Cada wega ta 2 x 35 minuut.
·         Cada pais por haci no mas cu 7 cambio.
·         Cada hungado mester hunga un minimo di 60 minuut durante e torneo.
·         E ganado di cada grupo lo avansa pa semi final, e ganadonan bayendo pa final y e dos ultimo lo hunga pa tercer luga.
·         Paisnan cu ta keda na di 2, 3 y di 4 luga lo hunga e weganan di play-off pa determina e rango final.

Aruba U15 Team & Staff:

Team U15 Aruba ta consisti di e siguiente hungadonan:

·         Juan Luis Cardona (S.V. RCA, Keeper)
·         Matthew Boekhoudt (S.V Britannia, Defensa)
·         Liam Calister (Willem II, Defensa)
·         Hubert Solagnier (S.V. RCA, Defensa)
·         Lukas Beyer (Denmark Academy, Volante)
·         Naim Restrepo (S.V. Bubali, Defensa)
·         Jonatan Quintero (S.V. RCA, Delantero)
·         Allan Vasquez (S.V. Britannia, Volante )
·         Samuel Quartas (S.V. La Fama. Delantero)
·         Born de Nobrega (S.V Britannia, Volante)
·         Jayron Gomez ( S.V. Dakota, Defensa)
·         Matthew Maduro (S.V Nacional, Volante)
·         Dapheson Sierra (Dordrecht, Defensa)
·         Drexxton Silva (S.V. RCA, Delantero)
·         Jayliano Wijnaldum (Alexandria’66, Delantero)
·         Jaylon Abath (S.V. Dakota, Volante)
·         Quincy Nelisse (Sparta, Delantero)
·         Kendrick Riva (S.V. RCA, Keeper)

E staf di Team U15 Aruba ta lidera door di coach Dreyer Bracho, apoya door di Assistant Coach Glen Sambo, Performance Coach Rigoberto Arevalo, coach di keeper Lionel Kaarsbaan, Dokter Guaicaipuro Jimenez, Physio Francis Maduro, Kit Manager Kevin Lake, Media Officer Jenilee Croes, y Team Manager Steve Escalona.

E “CONCACAF Boys U15 Championship” ta marca un otro momento historico den futbol di Aruba, specialmente pa e parti desaroyo, dunando oportunidad na hungadonan hoben pa competi na e nivel hubenil di mas den nos region, y alabes demostra cu nos ta un pais chikito, pero grandi riba mapa!

AVB ta puntra pa nos comunidad bishita tur e weganan di e torneo pero specialmente Aruba U15. Hunto nos ta haci futbol na Aruba mas grandi.