Directiva di Aruba Scholarship Foundation ta lamenta cu pa motibo di su situacion financiero, a scoge, despues di hopi deliberacion, pa no ta otorga beca na aplicante nobo cu lo sigui un estudio superior e aña academico 2020-2021. ASF ta enfatisa cu e becadonan existente cu aplica pa extende nan beca, cumpliendo cu e rekisitonan di ASF, si ta keda cu nan beca.
Comunidad di Aruba a confronta inesperadamente e pandemia COVID 19 cu tabatin y tin consecuencia hopi serio pa Aruba en general. Indudablemente esaki tambe a toca ASF.
Directiva di e fundacion tabatin planea pa organisa e aña aki un forma di recaudacion di fondo masha particular pa sigui yuda e aplicantenan nobo tambe e aña academico 2020 -2021, manera el a haci desde lansamento di ASF 32 aña consecutivamente. Mirando e echo cu COVID 19 a debilita nos economia, lamentablemente Directiva, obligatoriamente, a dicidi actualmente pa pospone e ehecucion di e plan di recaudacion di fondo te otro aña. Esaki a haci cu e situacion financiero di ASF pa otorga beca nobo no ta factibel e aña aki.
Otro aña 2021-2022 ASF lo continua cabalmente cu su programa di otorgamento di beca existente y di beca nobo.
Actualmente ASF tin 17 becado den exterior cu ta studiando cu hopi exito y cu ta cumpli cu tur rekisito academico. ASF ta sumamente orguyoso di nan prestacion halto y ta felicita nan tur y tambe nan mayornan pa nan sosten. ASF ta yama danki tambe na tur cu a sostene ASF den e añanan cu a pasa y cu nos ta sigur cu lo continua sostene ASF pa den futuro nos por yuda mas hoben Arubiano realisa nan soño pa sigui un estudio superior.
Finalmente un elogio y gradicimento na tur miembro di Directiva kendenan ta boluntario hopi dedica cu ta duna nan aporte maximo na bienestar di nos hobennan.
