Aruba Ports Authority a firma un acuerdo di compra di un tugboat cu e compania DAMEN Shipyards Gorinchem BV y un acuerdo cu e compania Svitzer Caribibbean Harbour Services BV cu a keda entre otro encarga cu e supervision durante constuccion y transportacion di e tugboat nobo, esta e “Damen Azimuth Stern Drive Tug 2811”. Tambe a firma cu AIB-Bank cu a percura pa e financiamento.
Ing. Jossy Figaroa, Director di Aruba Ports Authority a trece den su charla padilanti cu Aruba Ports Authority tabatin e tugboat Andicuri, pero cu na juli 2016 a saca e boto aki for di servicio debi na e edad halto cu e tabatin y no tabata bale la pena pa sigui inverti den dje.
E situacion financiero di APA na e momento ey no tabata permiti pa cumpra un boto nobo y pa e motibo ey a opta pa “lease” un tugboat pa 2 aña, cual termino ta vence na fin di december proximo. A bisa di e tempo ey caba cu si despues di 2 aña e situacion financiero ta miho, cu e ora si lo opta pa cumpra un tugboat.
Na prome instante APA a evalua pa cumpra un tugboat cu tin apenas 2 aña bieu ya cu por a cumpra e boto aki pa un prijs un poco mas rasonabel compara cu e oferta cu APA tabatin pa un boto completamente nobo. Pero na caminda a cambia di opinion no solamente pa motibo cu e personal náutico cu ta maneha e tugboat a trece argumentonan valido padilanti relaciona cu e riesgonan cu tin ora ta cumpra un boto segunda mano pero tambe como cu APA a logra haya un prijs pa un tugboat nobo cu ta basta cerca di esun segunda mano.
“Cu e tugboat aki nos ta prepara pa e siguiente 25 añanan, nos hendenan sigur lo sa di cuid’e y manten’e”, asina Ing. Jossy Figaroa a bisa den forma orguyoso.
APA a scohe pa un tugboat di e marca Damen pa motibo cu tin bon experiencia cu e marca aki y tambe como cu na Citgo ya tin dos tugboat di e marca Damen y asina Citgo lo por yuda APA cu conocimiento y piesa ora cu esey ta necesario. Fuera di e puntonan aki tambe ta asina cu Damen tin un dok na Corsou y ta haci mas fácil pa APA ora cu e tugboat mester haya su mantención grandi. E tugboat ta di 28 meter di largura y 11 meter di hanchura. E boto ta suficiente fuerte pa haci tur trabou necesario y por uz’e tambe pa yuda CITGO.
Lodewijk Franken, representante di Damen y alabes gerente di Damen Shiprepair Curacao a enfatisa cu a dura mas o menos 1 aña prome cu a logra alcansa e momento aki, unda ta firma un acuerdo di compra formal. E a trece padilanti cu e compania Damen a expande hopi den e region aki y cu awor nan por presenta nan mes y ofrece servicio cerca den Caribe mes. Lodewijk Franken a bisa cu Aruba mester ta orguyoso pasobra ora inaugura e tugboat aki, e lo ta e prome den henter Caribe. Aruba Ports Authority lo dispone di un tugboat ultra moderno, e ultimo generacion y esun di mas moderno. Ta un boto masha stabiel cu lo por ofrece mas y miho servicio.
Lo construi e boto na Vietnam y Damen a sigura cu den 60 dia despues di e firmamento di e acuerdo e shipyard na Vietnam lo entrega e tugboat nobo pues net prome cu fin di aña y después Svizter lo percura pa transporta esaki pa Corsow na unda lo haci algun adaptacion na dje na e dok di Damen. Ora caba cu e adaptacion un capitan di APA lo nabega e tugboat for di Corsou pa Aruba.
Pa final di februari of comienso di maart 2019 e tugboat lo yega Aruba.
