Na momento cu Space and Aruba Nature Foundation a bira miembro di e organizacion internacional, Aruba a bira un di e paisnan cu a haya chens pa duna nomber na un di e 4.444 explo planeta cu tin den atmosfera. Esaki a wordo anuncia door di presidente di SANF, Jeremio Maduro.
Despues cu SANF a bira oficialmente un stichting, un aña pasa, nan ta afilia tambe na International Astronomic Union. E organisacion aki ta esun cu ta duna SANF e autorisacion pa pueblo di Aruba pone nomber na un sistema solar. Pero esaki mester tuma luga via di un competencia.
Segun Maduro a splica, e nomber cu ta duna mester ta uno conoci na Aruba, sea di hende, cos of luga y cu tin un nificacion cultural of historico. Mester duna un splicacion di e nomber cu ta duna na e sistema solar y na e Exoplanet. Por ehempel, por scoge e tema di “reptil” y eyden por scoge e Juwana pa e solo y pa e planeta lagadishimispel. Mester tin mas nomber disponibel den caso cu descubri otro exoplaneta den cercania cu mester duna nomber na nan tambe, ya cu e ta keda den e mesun area.
Segun Maduro a splica, nan ta bay manda carta pa tur scol encurashando e muchanan pa participa den e competencia aki. Sinembargo e no ta limita of habri pa studiantenan so. En realidad henter pueblo di Aruba por participa. Simplemente por bay riba nan website of nan Facebook, unda cu tin un splicacion di e evento y por haya nan email adres unda pa manda e nombernan (spacenaturearuba.com). Riba e website tin un formulario unda ta yena e informacion.
Pueblo tin oportunidad pa entrega nan proposicion te cu dia 9 di october awor. Despues di esaki tur e nombernan proponi ta bay pa un comision di expertonan local – tanto den idioma como den historia – kendenan lo selecciona esnan cu ta pasa pa e siguiente fase. E comision mester entrega e lista aki pa dia 30 di october cu ta bay riba e website y for di esaki pueblo en general por haci su escogencia te cu 10 di december awor. SANF mester manda e nomber ganado pa dia 13 di december.
