Ta parce cu Gobierno di Aruba ta evaluando pa saca un man y hinca nos mes memey di un guera politico interno den nos pais bisiña Venezuela. Ta conoci cu e pais tin dos persona awor cu ta “claim” cu nan ta Presidente di e pais cu e nivel di inflacion mas halto na mundo y cu awor ambos ta luchando pa mantene poder. Merca, Europa (Hulanda tambe!) y varios otro pais mas ta na fabor di un cambio y di eleccionnan liber. Pero Aruba parce di no kier keda afo y a papia na celular cu oposicion Venezolano pa Aruba yuda y bira u “hub” pa ayudo humanitario cu mester yega e pais bisiña. E pregunta ta si nos ta cla pa esey, si nos kier esey y nos ta consciente di e enbergadura cu e rol “delicado” aki cu nos kier hunga den cara di Merca y Venezuela, siendo cu nos ta depende di ambos pa nos economia!
Mientras cu tin hende cu sin duda ta convenci cu algo mester sosode y cu mester bin un periodo di fria cabes pa e pais por bolbe bek na normalidad, na Aruba tin tambe ciudadanonan cu ta masha sceptico riba nos rol pa mete den problema di bisiña. Mayoria biaha ta esun cu mete tin chens di sali malo of perhudica. Ta teme cu si e problemanan escala, cu lo mira Aruba, mescos cu Colombia y Brazil como paisnan aliado pa nan por bay sconde of busca refugio.
Ya caba ta estima cu tin 17 mil Venezolano so ilegal na Aruba, di acuerdo cu cifranan cu Oficina Central di Estadistica ta dispone di dje pero cu Gobierno tin scondi den lachi. Esey ta pa duna un bista di e enbergadura di e problema cu Aruba ta den dje caba, sin cu nos a habri porta pa mas hende por bin of pa nos hunga e rol di “trampolin” pa ayudo humanitario. Ta mas cu obvio cu como isla chikito cu nos ta, cu Aruba no por carga e peso Venezolano na e momento aki, ni economicamente, ni nos mercado laboral y pio e retonan social cu e lo trece cune.
Gobierno ta scogiendo pa keda keto y laga e problema soluciona su mes, locual sin duda lo no sosode. Tanten cu Gobierno no gara e toro na su cacho y fiha un posicion cla riba e tema aki, e chens ta mas grandi cu Gobierno di Hulanda lo dicidi pa nos y asina hinca nos isla den man problema cu nos ta aden caba, pa via si e problemanan sociopolitico na nos bisiña.
Fuentenan ta sigura cu tin miembronan di oposicion Venezolano cu vinculonan directo na nos isla, cu awor ta presionando Prome Minister Evelyn Wever pa nos brinda sosten y cooperacion na e causa di oposicion Venezolano. Parce cu ya caba tabatin yamadanan haci for di Caracas pa Oranjestad pa e peticion di ayudo aki. Asina cu habri porta pa ayudo humanitario, nos ta habriendo porta pa yuda den un problema grandi cu Venezuela mes no por soluciona, pio un isla chikito di apenas 100 mil habitante manera nos.
Leopoldo Lopez tin contacto directo cu Gobierno di Aruba, pidiendo pa yuda oposicion Venezolano den nan lucha pa por tuma gobernacion over.
Riba Facebook varios personahe den comunidad ta puntrando Gobierno si tur Minister ta cabes pa carnaval of si tin hende ta atendiendo cu e problema serio cu tin pazuid di nos isla. Mester corda cu Hulanda ta basta leu di nos, pues si nos mes no tuma accion di e situacion reinando, pa ora Hulanda kier saca un man yuda kisas ta lat caba.
