Aruba off Road Foundation a perde caso contra Gobierno y Parke Nacional

5155

Despues cu Corte a pospone sentencia riba e fecha duna inicialmente, awe mainta tempran a anuncia resultado di e caso cu Aruba Off Road Foundation a cuminsa contra Fundacion Parke Nacional Aruba y Pais Aruba.

E organisacion cu ta representa e companianan di UTV y ATV a perde tanto e caso contra pais Aruba (Gobierno) como contra Fundacion Parke Nacional Aruba (FPNA).

E dos puntonan di consideracion tabata si e maneho di Parke ta en pugna principio generacion di bon maneho y si nan ta autorisa pa prohibi entrada di e ATV-nan na e parke.

Parke tin un maneho cu nan ta hiba, basa riba ley existente di naturalesa. Pues nan tin derecho pa crea e maneho pa proteccion di e flora y fauna. FPNA a mustra via di estudionan haci, cu AORF no a trece suficiente obheccion hustifica contra esaki, ta mustra e daño haci door di e tipo di vehiculonan aki. E vehiculonan aki pa motibo cu no solamente nan ta core riba e camindanan oficial, pero tambe riba e camindanan di santo. FPNA a haci estudio di con e situacion a deteriora of afecta e flora y fauna y tambe un rapport con e situacion a mehora ora cu e parke tabata cera pa un periodo.

Corte a bisa cu e caravananan di ATV den parke cu e desordo, cu ta mas hopi cu algun jeep, ta causa mas daño. Diariamente tin 100 caravana cu en total 715 ATV ta pasa den e Parke. E cantidad di jeep cu ta bishita e parke diariamente ta rond di 12 den 6 grupo di 2 jeep cada un. A mustra cu tur hende cu wak un caravana di ATV pasa unda cu ta, cu nan ta lanta masha stof mes. Pues ta haya proba cu mayoria di e daño causa den e parke ta bini di e vehiculonan ATV. For di punto di bista di proteccion di naturalesa, Parke a bini cu e maneho pa protege e naturalesa eyden, door di limita of prohibi vehiculonan ATV y permiti ainda e pasada di vehiculonan UTV y Jeep.

Loader Loading…
EAD Logo Taking too long?

Reload Reload document
| Open Open in new tab

Download [425.71 KB]

Corte ta conclui cu no tin violacion di e principio di trato igual y a bisa cu e compania a crea tournan sin tabatin combersacion cu FPNA pa loke ta nan maneho.

Pues conclusion ta cu e introduccion di un maneho nobo di FPNA  no a actua en pugna cu principionan general di bon maneho.