Aruba menciona den scandal di petroleo pa Venezuela

Nomber di Aruba ta hinca den un scandal di entrega di combustibel pa Venezuela, mientras cu tin un sancion internacional contra e pais bisiña. A perde e cargamento di petroleo aki di bista abordo di e tanker Aldan pa 29 dia.

Pa algun dia caba ta cuestionando un tanker cu a sali for di Trinidad & Tobago cu un cargamento di fuel oil. Su destinacion tabata un poco misterioso y autoridadnan concerni tabata vigila e ruta cu el a duna y tuma despues cu el a bandona e terminal na Trinidad & Tobago. Mas ainda, pasobra esaki a sali for di e isla despues di un bishita relampago di e Vice Presidente di e regimen Venezolano Delcy Rodríguez na e isla. Tur esaki a tuma luga, pero a bini den bista publico awo cu tin 5 tanker Irani na caminda pa Venezuela, cu cargamento di fuel y otro materialnan. 

Publicacion

E corant The Guardian di T&T a publica cu awor ta surgi yen di pregunta unda e 150 mil bari di petroleo cu Paria Fuel Trading a bende cu ES Euro Shipping a keda. Embahada di Reino Hulandes na T&T a bisa Gobierno di e isla aki cu e tanker MT Aldan nunca a drenta awanan teritorial di Aruba cu e cargamento di fuel. 

“Pa loke ta e tankero kimico MT Aldan, hefe di waf a informa Gobierno di Aruba cu nunca el a ricibi un cuestionario (pre-yegada) for di un agencia local, pidiendo pa drenta awanan teritorial di Aruba pa ancra y/of transborde (ship to ship operation),” e Embahada a informa. Nan ta splica cu e tanker Aldan a recoge e fuel na T&T dia 21 di april y inicialmente mester a bay St. Eustatius pero e barco a cambia puerto di destinacion sin informa Paria. Ora cu e asunto aki a Sali na cla, Paria a tuma conta cu ES Euro Shipping y a haya confirmacion cu e tanker no a bay St Eustatius pero tabata na Aruba. 
E compania mes a pone un aviso den e corant dunando detaye di e benta. Di acuerdo cu esaki, e barco a Sali di T&T dia 21 di april, y ora a cuestiona e asunto publicamente dia 23 di april, Paria a contact ES Euro Shipping. E momento ey Paria a haya sa cu e destinacion di e fuel tabata pa un cumprador na Aruba y a adapta e contracto y na mesun momento a pone e clausula cu e petroleo no por yega na un pais sanciona. 

Gobierno di Aruba por medio di Embahada a informa cu e informacion aki no ta corecto y cu tur barco cu mara den awanan di Aruba mester contact un agencia local tres dia prome cu nan yega. “Barconan cu mester ancra den awanan teritorial di Aruba of drenta waf of haci un operacion di STS, como regla mester apunta un agencia local y tur informacion mester drenta 72 ora prome cu drenta awa teritorial di Aruba,” e Embahada a bisa, y esaki Aldan no a haci. Y Gobierno di Aruba no sa unda e tanker a bay.“No a mira MT Aldan riba e “Automatic Identification System” denter di e awanan teritorial y/of e zona economico di Aruba,” nan ta bisa.Remarcabel ta cu MT Aldan tabata mara den puerto Amuay di Venezuela dia 13 di maart. Esey tabata e ultimo “port of call” prome cu el a bay Pointe-a-Pierre pa recoge fuel for di Paria dia 19 di april. E barco a keda mara na Pointe-A-Pierre te cu 21 di april y sali dia 22 di april pero tabata Offline te cu ayera, 21 di mei, unda cu e AIS Tracker a señale cerca di e frontera maritimo cu Aruba. Esaki ta nifica cu e barco y e 150.000 bari di fuel tabata disparce pa 29 dia. 

E detayenan di su ruta ta marca ainda cu e ultimo puerto unda cu e tabata ta Pointe-a-Pierre dia 21 di april y sin ningun informacion di su ruta entre T&T y Aruba, ta casi imposibel pa bisa unda e tabata e ultimo cuatro simannan. Paria a confirma cu e contracto di benta tabata di un cumprado Arubano pero no a menciona kende e ta of e dia cu e contracto a wordo redacta.Loke ta hala atencion ta e compania ES Euro Shipping SA ta di un magnate Venezolano (Wilmer Rupert).