Expertonan cu ta siguiendo e proceso di destaho publico pa bin cu un Incinerator pa Aruba a bay investiga e peticion di Gobierno relaciona cu e rekisitonan pa e forno por traha y kima sushi, sin separa y sin recicla. E cifranan preliminar ta demostra cu no tin suficiente sushi na Aruba pa e por funciona debidamente, ni pa e por produci e coriente desea y pio pa soluciona e reto di medio ambiente cu nos ta aden. Ta parce cu ta “pushando” e proyecto aki cu gran urgencia, cu lo costa comunidad un aumento di tarifa sigura, pa cubri e mey biyon florin cu e lo costa den e siguiente añanan.
Pa pone e hechonan den perspectiva; Aruba ta produciendo no mas cu 67.000 ton di sushi pa aña. For di e cantidad ey, EcoTech te reciclando tur carton, aluminium, hero y likido cu hunto ta pisa 10.000 ton pa aña. Pues na final ta restando alrededor di 57.000 ton di sushi, despues di separacion y reciclahe. E sushi ey awor ta wordo procesa den “Envirobales” cu ta dera den un pit na Ser’i Tijshi. Hunto e proceso aki awor ta costando 120 florin pa ton pa consumidornan, tanto residencial como comercial.
Waste to Energy
Den e destaho publico aki, Gobierno ta pidiendo companianan interesa pa bin cu un Incinerator pa kima mas di 100 mil ton di sushi, pa por procesa 5 MW di coriente pa dia. Ta bon pa splica cu WEB ta produci 125 MW di coriente, pues cu esaki lo produci 4% di coriente pa WEB. Si tene e cifranan den consideracion, e ora mester mira cu Gobierno kier inverti US$300 miyon pa por produci 4% di coriente pa WEB, locual e compania di produccion di coriente ta haci pa un tarifa mucho menos cu esaki.
Rumannan Oduber lo mester “deal” cu otro
E reto awor pa por cumpli cu e deseo di Gobierno, ta pa procesa 100K ton di sushi, cu ta net dobel di loke Aruba ta produci. E compania cu lo maneha e incinerator lo mester importa sushi di otro pais na Aruba pa por yega na 100 mil ton, cu consecuencia cu sushi di otro pais lo keda atras na Aruba despues di kim’e. Minister Otmar Oduber y su mesun ruman Luis Oduber di WEB mester sinta na mesa, pa por mira con ta yega na un acuerdo. Sea Gobierno lo para memey di e negosacionnan of ta e compania cu gana e Incinerator lo mester yega na un acuerdo cu WEB pa e cumpra e coriente cu e lo produci. Ta con e compania por “bid” sin sa ainda si WEB lo cumpra e coriente for di dje y na ki prijs? Un cos ta sigur, pa e ganado di e destaho aki por saca su inversion, e “tipping fee” lo mester por lo menos triplifica. Un asunto cu sin duda comercio ni comunidad no ta sperando na e momentonan aki.
Destaho lo bay dor of no?
E destaho publico lo mester tuma luga diabierna awor, pero Minister Otmar Oduber a anuncia diamars cu e ta evaluando si lo cambia e fecha debi cu varios compania a pidi pa cambia e fecha. Esey por nifica cu e companianan no ta sacando nan cifranan ainda of no tin interes. Por lo menos un compania di Spaña a pidi pa prolonga e fecha, pero algun siman pasa Gobierno a contesta cu absolutamente lo cambia e fecha. Awor cu a ripara cu e interes no ta existi, toch ta cambiando di opinion.
Incinerator pero sin sushi pa kima
Ta bin acerca cu companianan participante lo mester tene na cuenta cu e asunto di maneho di sushi na Aruba lo no bay facil y chens ta grandi cu e lo bira un bataya, cu por bay hasta den Corte. Gobierno ta bisa cu no por exporta sushi sin mas, pero como cu por lo menos un di e companianan cu ta procesa sushi ta papiando di exporta RDF, lo por nifica cu esun cu lo maneha e Incinerator, lo no tin acceso casi na sushi mes. Di otro banda, e mesun Gobierno a caba di habri un centro na Pos Chikito pa reciclahe. Ta imposibel cu ta buscando mas sushi pa kima, mientras cu di otro banda ta pidiendo pueblo pa recicla loke no ta uza mas. Si e centro bira un exito, lo nifica cu menos sushi pa incinerator kima pa por produci coriente pa WEB.
Aruba no tin mercado pa Incinerator!
E realidad riba mesa ta cu e proyecto di Incinerator ta mucho grandi pa Aruba y mucho caro, teniendo cuenta e tiki sushi cu nos isla ta produci anualmente. Kisas ta e realidad aki riba mesa mes lo por ta spantando participantenan cu ta mira adelanta cu e proyecto ambicioso y riskante aki di Minister Otmar Oduber, tin hopi chens pa fracasa.
