Aruba Juniors ta simbolo di tradicion y celebracion riba Dia di Himno y Bandera

Diadomingo pasa a inicia na compleho deportivo di Sport Vereniging Aruba Juniors e torneo annual “Copa Himno y Bandera”, cu ta culmina dia 28 di april.

Durante e mesun torneo aki lo hunga un torneo internacional tambe cu ya a inicia den weekend pasa. Pa loke ta trata e fin di siman benidero cu ta 16, 17 y 18 di maart lo tin weganan cu participacion di Corsou, Hulanda y Aruba.

Den Liga 50 lo ta di bishita e team di Quick Amersfoort di Hulanda y for di di Corsou e team di Baranca. Den Liga 60 lo tey di bishita Caterpillar y Jaws ambos di Corsou. Ekiponan di Aruba cu lo participa na e torneo Internacional ta Survival, Kibaima, Surprise y Aruba Juniors den Liga 50. Benjamin Tigers y Aruba Juniors lo representa Liga 60 durante di e fin di siman aki.

Diadomingo cu a pasa e prome weganan di e torneo internacional a tuma luga unda cu e ekiponan local a topa otro. Den e prome wega di liga 60 Aruba Juniors ta gana Benjamin Tigers cu Score di 2-1.  Survival ta dal Aruba Juniors 11-1 y Surprise a gana Kibaima 11-3 den liga 50.  

Diasabra y diadomingo awor e torneo internacional ta continua cu e buelta eliminatorio y dialuna dia di Himno y Bandera lo tin e finalnan. Den poule A lo topa otro Surprise, Kibaima y Quick Hulanda mientras cu poule B ta consisti di Aruba Juniors, Survival y Baranca. Tur ekipo ta topa otro un biaha den su poule y tambe lo hunga un wega crossover. E dos ekiponan cu gana nan poule lo hunga e final dialuna dia di Himno y Bandera.

Manera ta tradicion dia di Himno y Bandera SV Aruba Juniors ta homenagea personanan cu a destaca den area di deporte y of organisacion. E aña aki ta wordo homenagea Amado Rosina y Severo “Chago” Hernandez.

Homenage na e dos personanan aki lo tuma lugar pa 2or di merdia. Ambiente musical ta na encargo di Zeta Band for di 4or di atardi te cu 8or di anochi. Aruba Juniors su bar y cushina lo ta bon surti manera di custumber cu dushi seafood soup y plato di pisca. Dia di Himno y Bandera 18 di maart Aruba juniors ta wardabo manera ta tradicion pa pasa un dia deportivo celebrando nos Dia Nacional.

Comments

comments