Na luna di November nos isla lo ricibi atleta nan di diferente pais cu lo topa otro den e prome edicion di e Aruba International Karate Cup (AIKC2019).
Un evento cu lo marca historia door cu esaki lo ta e prome biaha cu un torneo di e disciplina aki lo tuma lugar den e region di Caribe. E Renaissance Convention Center lo ta e sede deportivo di e magno evento aki unda cu Diasabra 16 y Diadomingo 17 di November diferente ekiponan proveniente for di Spaña, Pakistan, Argelia, Venezuela y Panama (entre otro) lo competi den categoria nan: Senior, Cadete, Junior y categoría Infantil.
“Nos objetivo cu e AIKC2019 ta pa duna un spacio di honor na e deporte di Karate den e region Caribe, nos proposito ta pa converti Aruba den un parada obligatorio pa tur atleta di mundo den nan proceso tanto den desaroyo, como pa bira profesional”, ta loke Ángela Medina a destaca, PR di e competencia. E programacion di e Aruba International Karate Cup ta contempla, aparte di e competencia nan y exhibicion nan, dos seminario cu e Karateka nan destaca: Douglas Brose (Brazil), dos biaha campeon mundial di Kumité, y Damian Quintero (Spaña) number dos na e ranking mundial di Kata.
Esaki lo ta un excelente oportunidad pa nos deportista nan local por tin contacto directo cu e atleta nan di taya mundial aki, “e idea ta pa nan por comparti, pa nan por biba un experiencia cu lo motiva nan y cu nos hoben nan por contagia di e motivacion, perseverancia y amor cu a converti e atleta nan invita aki den loke nan ta awendia”, Medina a resalta. E atleta nan interesa pa participa por registra caba na www.arubakaratecup.com, mientras cu publico general cu lo desea di presencia e competencia nan lo por haci esaki for di 9 or di mainta te cu 7 or di anochi, completamente gratis, riba tur dos dia.
