Aruba Huis kier yuda Gobierno cu Social Crisis Plan

Minister Plenipotenciario Guillfred Besaril a tene un reunion cu Procurador General mr. Alexander van Dam. Tambe presente tabata Nuris Dabian, coordinador di e departamento di Asunto Social na Arubahuis. Meta principal di e combersacion ta pa mira unda Arubahuis por hunga un rol den e Social Crisis Plan pa loke ta toca e aspecto hudicial.

Procurador General Van Dam a bisa bon cla cu loke husticia mester dje cu hopi urgencia ta professional forensico pa duna e sosten nesesario. Segun Van Dam esaki ta sumamente importante pa dedecta e seriedad di un caso of di un melding. E Procurador General ta sigi bisa cu aunke cu husticia tin un rol importante den casonan social, ta e partnernan riba tereno social ta esnan primordial pa tuma pasonan rba e tereno aki.

Minister Besaril a bisa cu mirando cu Arubahuis tin bon relacion cu diferente gemeentenan y instancianan social na Hulanda, e ta kere cu Arubahuis por hunga un rol importante pa e partnernan na Aruba. Di e manera aki e mandatario a bisa e Procurador General cu pa cualkier intermediacion e por acerca Arubahuis.

Despues di e combersacion Procurador General a invita Minister Besaril pa un presentacion di e Veiligheidshuis Aruba. Akinan e procesmanager di Veiligheidshuis Aruba, drs. Bernice Schulte a duna splicacion di e kico e Veiligheidshuis ta haci y ken ta e partnernan den e proycto aki. Pa duna un idea mas cla di Veiligheidshuis Aruba, sra. Schulte a presenta un video tocante e proyecto. E video na un manera hopi simpel ta enfoca riba problemanan social. Proximamente e video aki lo keda presenta na e canalnan di television pa informa e comunidad.

Minister Besaril a gradici Procurador General y su staf pa e reunion y tambe e compromiso haci pa traha hunto pa enfrenta e retonan social di nos comunidad.