Aruba a bay cu e titulo di Mrs. Top of the World Queen 2021

Diasabra a tuma luga e certamen virtual di Mrs. Top of The World, cual a tuma luga na Rusia y a conta cu e participacion (virtual) di Aruba.

Riba su mes, e certamen mes a cuminsa un siman pasa y diasabra tabata e ‘Anochi di Coronacion’. Mrs. Top of the World Aruba, Lizayra Polak, a indica cu henter e certamen a bay virtual, unda cu mester a entrega algun potret. Tambe nan mester a haci un reto di talento y tabata tin tres dia di entrevista. E prome dia nan a papia di e talento, pakico nan ta haci e talento y kico e candidata kier show den e talento. Diabierna tabata tin e ‘profile interview’, cu ta un entrevista cu hurado. Y diasabra tabata e ‘Anochi di Coronacion’. Door cu e ta virtual, y na Rusia ta anochi, a yame ‘Anochi di Coronacion’.

Esaki sigur no ta e prome certamen den cual Lizayra ta participa. Aña pasa el a participa den Señora VIrtual Internacional, cu tabata tambe, virtual cual a tuma luga na Latino America, unda cu Aruba, den persona di Lizayra a bay cu e titulo maximo. E aña aki, el a dicidi di reta su mes poco, di participa den un certamen Europeo, unda cu e standardnan ta diferente di Latino America. Ta un preparacion na un otro nivel, un reto pa su mes persona, pa mehora su mes y siña un poco mas di cada pais. Di cada certamen ta siña algo diferente. Sigur e tabata un reto basta grandi, mirando cu tabata tin 18 dama cu tambe a participa. Tabata señora hopi bunita y cu hopi talento, cu ta un reto pa cada candidata pa duna lo maximo di su mes.

Pa loke ta e corona y e sherp, e comision organisado lo manda esakinan pa Aruba. Tambe Lizayra a manda un palabra di gradicimento pa tur su sponsornan, pero tambe na e team di MedCare Clinic, cu tabata pusha pa sigui vota y a like & share. Tambe na Karena Maduro, National Director di e organisacion di Aruba, na Jennifer Croes-Veeris, y na un y tur cu a hacie esaki un realidad.