Miembronan di e sector di entretenimento ta un di esnan mas afecta den e pandemia. Musiconan ta e prome nan cu no por a sigui traha y e ultimonan pa bolbe trabou bek.
P’esey via di Aruba Entertaintment ta trata di uni e musiconan y artistanan di profesion pa yuda nan den nan trabou y nan derechonan. Esaki ta loke cu e vocero Ofo Escudero.
Asina na momento cu Aruba Entertainment a cuminsa, a constata cu na Departamento di Labor nunca tabatin un keho di musico cu a haya problema na trabou of cu no a reconoce su derechonan. Esaki pa motibo cu no tabatin un union, ni organisacion pa representa e grupo di trahado aki. AE kier trece un cambio den esaki. Nan ta contento cu e cantidad di miembro cu nan a logra te aworaki.
Un di e prome pasonan cu nan a dal ta pa traha un badge pa tur e miembronan. Esaki ta pa momento cu nan ta riba caya, principalmente den ora di Toque de Queda, pa demostra cu nan ta na caminda pa cas despues di a traha. Cu nan ta un miembro reconoci door di e Aruba Entertainment y cu nan ta respeta tur regla y protocol.
E organisacion tambe, mirando con hopi e pandemia a dal musiconan, a acerca sector comerial pa duna nan miembronan descuento ora di compra, mirando cu nan ta un di e gruponan mas afecta. E organisacion ta contento cu e reaccion di comercio, ya cu gran mayoria a bisa cu lo duna entre 5 y 25% di descuento riba compra na momento di mustra e badge di miembresia di AE.
Escudero a bisa cu nan lo sigui na bienestar di e musiconan y lo trata di convence nan pa bira miembro cu cada accion cu logra na nan fabor.
Nan a reuni e siman aki cu Departamento di Cultura, unda cu a yega na cierto palabracion y tur esaki ta bay pone riba papel y manda pa e miembronan.