Aruba den Festival di Circo na China

Aruba ta bay tur skina di mundo, sea ta den deporte, den musica y asina nos por keda menciona. E biaha aki Aruba lo bay China den un di e festivalnan mas grandi na mundo di circo, caminda e lo ta entre varios otro pais cu a aplica pa esaki.

RCC Aruba ta un grupo di acrobacia cu lo bay representa nos bandera na China e siman aki y Diego Jaramillo, director di e compania a conta cu nan ta masha honra di a yega asina leu di por representa Aruba den e pais Asiatico aki.

Diaranson nan tabata tin un presentacion na Paseo Herencia, p’asina Aruba henter por mira kico nan ta bay haci na China.

Jaramillo ta conta cu un compania di Hulanda a tuma contacto cu nan, despues di a mira nan videonan riba Youtube y tambe riba Facebook. Awo, nan tin e sosten di e compania aki cu nan ta bayendo otro siman. Ta hopi dedicacion y trabao duro, mirando cu e acto ta consisti di maniobranan peligroso. Nan tin tres luna preparando den e acto aki. Tur dia nan ta trahando duro. Nan ta bayendo China cu 6 persona y tur ta acrobata.

Aruba den Festival di Circo na China

Aruba den Festival di Circo na China.Click link pa mas https://24ora.news/31hH6Iy

Posted by 24ora on Monday, October 14, 2019

Trabao duro. Segun Jaramillo mester sinta, crea, pensa riba e acto. E acto ta consisti di un pida di palo, un acrobata ta bula un banda y e di dos atleta ta bula e otro banda. Nan kier bin cu mas innovacion tambe. Durante di nan presentacion, nan a mustra un fragmento cu nan lo haci na China. E acto ta dura 7 minuut

Cuanto hende? Por lo menos 450 persona ta aplica pa bay den e festival. Durante e festival aki 20 grupo di tur skina di mundo a keda selecta y cu ta bayendo China pa duna nan presentacion.

Gradicimento: Jaramillo ta gradici henter e ekipo. Nan a traha hopi duro e lunanan aki. Tambe ta gradici Ruby Eckmeyer kende a apoya nan door di otorga nan bandera di Aruba, tambe cu banderin y pa nan por uza e nomber di Aruba den exterior.

Ta spera cu henter pueblo di Aruba a mira na presentacion y a gust’e. Nan lo bay haci nan maximo esfuerso na China pa haya un bon posicion y laga Aruba su nomber na halto.