Husticia ta y lo keda un punto importante durante reunionnan interparlamentario cu a tuma luga na Corsou siman pasa. Interparlementaire Koninkrijksoverleg (IPKO) ta tuma luga dos bes pa aña, un biaha na Hulanda y un biaha den un di e islanan di Caribe Hulandes. Rocco Tjon (MEP) a presidi e grupo di trabou interparlamentario, cu ta enfoca entre otro riba husticia. E biaha aki a palabra concreto cu lo urgi na e respectivo Gobiernonan pa instala un comision cu representacion di tur isla pa yega na solucionnan duradero y comun pa e circumstancianan di detencion den Reino.
Normannan internacional
Manera ta conoci Aruba como pais, pero tambe tur e otropaisnan den Reino, mester cumpli cu normanan internacional, pa loke ta procesonan pa procesa peticionnan di asilo, pero tambe circumstancianan bou cual e personanan, cu ta en espera di un contesta, ta wordo ubica. Pero mas aun tambe a pidi atencion pa circumstancianan na e respectivo prisonnan di Aruba, Corsou y Sint Maarten. Ta importante pa yega na un plan comun pa e paisnan den Reino door cu tur ta mara na e mesun normanan internacional.
Plan comun
E plan comun cu e grupo di trabou traha lo mester presenta alternativanan concreto. Akinan por pensa riba alternativanan pa detencion, manera observacion electronico (cual lo baha gasto), y percura pa resocialisacion ta mas efectivo. Pero tambe mester pensa riba intercambio di conocimento riba tur tereno pa loke ta e aspectonan cu cada pais ta wordo “geaudit” riba dje.
IPKO
Durante e reunionnan di e grupo di trabou a trece pa dilanti cu tur pais ta señala e necesidad pa traha mas hunto riba e topico aki. Esey ta e motibo cu un peticion ta bay pa e Ministernan di Husticia di cada pais den Reino, cual por cierto ta reuni e siman aki na Corsou, pa instala e “task-force’ y bin cu solucionnan concreto na beneficio di Reino.
Pa Conclui
Importante pa señala cu diferente aspecto pa yega na mehoracion di KIA tin su atencion, pero ta importante pa sigui enfoca riba esaki. Ya caba tawatin combersacion riba e punto akicu Minister di Husticia y ela duna di conoce di ta wak esaki como algo positivo tambe. E peticion di parti e plataforma di IPKO ta pa prome cu fin di 2020 yega na un reportahe extenso, con hunto lo yega na solucionnan duradero y presenta esaki na Parlamento.
Aruba cu delegacion mas grandi
No por keda sin menciona cu Parlamento di Aruba tabatin e delegacion di mas grandi di henter IPKO. Un total di 13 persona a biaha di Aruba pa e reunion, mas cu Hulanda y mas cu Corsou mes, cu a reuni na cas. Anto esaki cu POR no a participa na e reunion, sino e delegacion lo tabata mas grandi ainda. Sint Maarten no a participa debi na eleccion net awo.
Pa lesa e acuerdo final entre e tres Parlamentonan, click AKI.
