Aruba cu 3 caso so activo: Un di e rumannan contagia cu Covid-19 a cura

Tabata dialuna dia 29 di juni ultimo cu a informa cu Aruba a haya dos caso atrobe di Covid-19, despues di simannan cu nos isla tabata Covid-Free. Ta trata di dos ruman muhe, procedente di Barranquilla, Colombia. Ambos ta residente di Aruba y por lo menos un di nan tin nacionalidad Hulandes caba. Nan tabata cu vakantie na Barranquilla pero a keda pega eynan den pleno Coronavirus. A interna un den hospital cu keintura riba 40 grado. Pero e otro cu a keda cas a cura completo, cu consecuencia cu nos isla a reduci e cantidad di casonan activo di 4 pa 3 desde ayera caba. 

Tabata na februari ultimo cu dos ruman muhe a bay vakantie cerca famia na Barranquilla. Siendo eynan a start e brote di Covid-19. Cu tur e medidanan cu Aruba a tuma, nan a opta pa keda eynan. Pero awo, e situacion a bolter y Colombia ta memey den su “peak” pa cual a opta pa awo si regresa cas. Nan no tabata malo ni tabatin sintoma. Despues di dos siman na Aruba, faltando un dia pa sali for di cuarentena, ata ta presenta sintoma y un di e rumannan tabatin keintura pisa y riba diadomingo 28 di juni ambos señora a test positivo pa Covid-19.

Mester bisa cu un di e rumannan a bira malo y cu ambulance a transport’e pa Hospital pa tratamento. A intern’e pa un tempo. E otro ruman a keda cas isola y sin sintoma. Diabierna ultimo el a test pa di dos biaha sigui tras di otro y ambos test a sali negativo, pa cual desde diasabra ultimo e no ta isola mas y por move trankil riba nos isla. E ta por lo menos un di e pashentnan cu lo no contagia mas pasobra su curpa awo a desaroya antistof pa bringa e Coronavirus. 

Su ruman muhe ainda no a test negativo pero a mehora drasticamente si. Ta spera cu den e siman nobo aki e tambe lo sali for di e casonan activo. For di DVG nos a haya confirmacion cu e casonan activo a baha di 4 pa 3 y cu tin 1 solo pashent awo interna ainda den Hospital pa motibo di Covid-19, pues di e tres casonan cu a resta, 2 pashent ta na cas y 1 so ta interna.