Mientras cu ayera tabatin solamente 6 caso positivo na Corsou y 110 pashent cu a recupera, toch nos isla ruman ta keda cu 1027 caso activo ainda. Na Aruba nos tabata na 100 caso te cu recien pero despues di e celebracion di Pasco y Aña Nobo, ta parce cu nos isla a start un competencia feros pa gana Corsou pa e premio di e isla mas contagia cu Coronavirus den Caribe Hulandes.
Awe mainta Minister di Salud Publico di Aruba, Dangui Oduber a anuncia cu e casonan positivo a subi y a pasa 100 caso pa awe, cual ta haci e preocupacion mas grandi pa desaroyonan na nos isla. Segun Departamento di Salud Publico (DVZ) un total di 19 persona a recupera, a registra un total di 110 caso nobo di Covid-19, di cual 109 ta residente y 1 no-residente.
Cantidad total di testnan ehecuta ayera na e diferente localidadnan entre otro laboratorio di hospital, laboratorionan priva y aeropuerto ta 892 test, y e “positivity rate” bou di residentenan ayera ta 34%. Activo tin awe 429 caso, cantidad di fayecido relaciona cu Covid-19 a aumenta na 50.
Hospital ta informa cu tin un total di 13 persona interna di cual 5 ta den Cuido Intensivo y 8 riba unidad general di COVID.
