Durante di e prome siman di vacacion Aruba Tourism Authority hunto cu Aruba Certification Program (ACP) a organisa e di tres edicion di su kids camp ‘Turista riba mi isla’. E aña aki e camp a wordo organisa pa prome biaha full dia y tabata un siman completo yena cu diferente excursion y tayernan educativo. Meta di e camp ta pa nos hobennan entre 9 y 12 aña di edad siña den un forma interactivo mas di Aruba su historia, cultura, geologia y tambe e sector turistico. Esaki ta fomenta aprecio pa locual ta di nos y interes pa e sector aki serca e hoben nan.
E muchanan a haya oportunidad pa bishita diferente establecimento durante di e camp, manera Parke Arikok, unda nan a siña di nos naturalesa y historia, tambe nan a haya un tour den centro di Oranjestad pa asina conoce mas di nos capital. A bishita Casa del Mar y Matthew’s Beachside Restaurant unda muchanan a siña un tiki mas di nos industria turistico como tambe nos hospitalidad inigualabel. Tambe a bishita Aruba Airport Authority, Happyponics, Museo di Industria, Cosecha San Nicolas y Aruba Aloe Balm.
Durante di e camp nan a haya tayernan interactivo y oportunidad pa siña un poco di nos musica tipico, tayer culinario, a siña prepara pan bati y frekedel crioyo. Na Mangel Halto a tuma un tayer di e diferente matanan di mangrove y nan funcion. A haya un tayer di plastic beach party, a siña un poco mas tocante reciclahe y separacion di plastic. E ultimo tayer tabata tocante e motibonan cu un turista ta bishita nos isla pero tambe e importancia di dunanan un bon servicio.
E ultimo dia di camp a culmina cu un ceremonia pa tur e mayornan na unda cu e muchanan a duna un presentacion di e diferente actividadnan cu un turista por haci.
Aruba Tourism Authority ta sumamente contento y orguyoso di por a aporta di e forma aki na e futuro di nos dushi isla Aruba.
