Un otro dia ta tras di lomba pa loke ta trata e ITF Aruba Beach Tennis Open 2018 y ta keda unicamente 2 dia pa e torneo aki jega su final. Pero prome cu esei, diahuebs anochi, tabata tin e final di Nations Cup.
E weganan a cuminsa un biaha mas for di 9or di mainta y anochi, cu un publico masha grandi mes, Italia y Brazil ta bolbe jega e final pa asina bai disidi ken lo gana e titulo di e pais mihor den Beach Tennis pa loke ta e torneo na Aruba. Ya pa di dos aña consecutivo, e dos pais nan aki ta den final. Despues cu e ekipo di femenio di Italia a gana Brazil, e ekipo masculino di Brazil a bin saca cara y gana pa por a pusha un di 3 partido cual e ora ey ta e mix doubles. Den e mix doubles, Brazil, cu nan duo Viniy Joana ta bolbe demostra cu nan ta e mihor duo mixto den e deporte aki, y ta gana e titulo maximo pa Brazil.
E ekipo di Aruba a logra jega te semi finals pero e perde contra e fuerte ekipo di Brazil.
E weganan ta sigi diasabra y lo termina diadomingo, cu wega nan cuminsando di 10or di mainta te cu 9or di anochi. Nos ta warda boso na Eagle Beach.
