”Nos tabata precisamente den training di seleccion nacional ora e noticia a drenta. Henter e ambiente durante e training a cambia. Nos basketbolistanan tabata den shock”, asina Kenneth Vrolijk a conta nos durante un entrevista riba pleno veld di basketball na Club Estrella na Santa Cruz. E muchanan entrenando bou guia di e conocido Rudy Croes, tur ta mira Kobe Bryant como un berdadero idolo, un ehempel den disciplina y determinacion pa logra tur Bo metanan. Su morto repentino ta laga un bashi den e deporte, pero si un leyenda cu hopi lo inspira riba dje pa logra mas den deporte y mas den bida.
Kenneth Vrolijk ta encabesa e federacion di basket na Aruba desde september 2019. For di 2017 e ta den directiva pero aña pasa el a tuma e timon over y na mes momento a bira miembro di e comision di desaroyo di deporte mundial di Federacion Internacional di Basketball (FIBA). Su entrada den e federacion mundial ta duna Aruba hopi mas oportunidad y acceso na fondo pa desaroyo, conocemento y ekipo.
“Basketball mescos cu varios deporte a sinti un caida den mirando cu muchanan rond mundo ta enfocando mas riba tecnologia manera Xbox of Playstation”, asina Kenneth Vrolijk a admiti. Di otro banda, e ta contento di menciona cu na Aruba, e ultimo 6 pa 7 aña basketball a sa di conoce consistencia di atleta. Hecho ta cu basketball ta un di e disciplinanan di deporte cu mas participacion na Aruba, pa cual ABB ta masha satisfecho, pero cu e speransa cu mas mucha y hobennan lo uni na e deporte aki.
A funda Aruba Basketball Bond dia 26 di januari na aña 1952 y actualmente tin 5 club miembro. Nan ta:
- Aruba Jrs
- SUF Stealers
- De Vuyst Impact
- CEO Dream Basketball
- SV Estrella
Oficialmente Aruba Basketball Bond tin registra mas di 300 atleta cu ta participa den campeonato pero tambe tin esunnan cu ta hunga na diferente parke sin cu ta registra.
Si abo ta interesa pa hunga basketball, subi e pagina di Facebook di ABB na https://www.facebook.com/ArubaBasketballBond/ y nan mes lo yuda Bo pa hinca Bo den contact cu un di e 5 ekiponan activo. Probablemente esun mas cerca di Bo cas. Basketball ta un deporte di disciplina, hopi accion y movecion, cu ta bon pa bo salud y ta aumenta bo spirito di kier sobresali y gana!