Aruba Basketball Bond lo haya cancha regalo

452

Federacion Internacional di Basketball (FIBA) a anuncia cu pa aña 2020 nan lo recompensa 10 federacion di e 213 federacionnan nacional cu a demostra progreso den yuda desaroya e deporte na e paisnan aki. Den e 10 federacionnan aki, a scoge Aruba! Esaki ta un tremendo noticia pa e federacion nacional di basketball na Aruba. E donacion aki sin duda lo yuda e disciplina di 3X3 unda cu den e ultimo weganan olimpico hubenil, tabatin islanan cu tin menos di 200 mil habitante cu a competi, demostrando cu si nos crea un plan strategico, cu Aruba Basketball Bond (ABA) tambe lo por yega aki!

Aruba Basketball Bond ta sigui haya elogio internacional dor di FIBA. E aña aki tecniconan di FIBA Americas lo bin Aruba pa finalisa proceso di e cancha. Presidente di Aruba Basketball Bond, mr. Kenneth Vrolijk lo biaha na luna di mei pa e headquarter di FIBA Americas na Miami pa haya guia con desaroya un liga di 3X3 na Aruba. Tambe ta intencion di FIBA pa duna Aruba un man den crea plannan strategico pa futuro pa den e disciplina aki.

Kenneth Vrolijk ta encabesa e federacion di basketball na Aruba desde september 2019. For di 2017 e ta den directiva pero aña pasa el a tuma e timon over y na mes momento a bira miembro di e comision di desaroyo di deporte mundial di Federacion Internacional di Basketball (FIBA). Su entrada den e federacion mundial ta duna Aruba hopi mas oportunidad y acceso na fondo pa desaroyo, conocemento y ekipo.​

Presidente di ABA, Kenneth Vrolijk, diasabra ultimo na Dominica, hunto cu Secretario General di FIBA, Andreas Zagklis.

A funda Aruba Basketball Bond ​dia 26 di ​j​anuari ​na aña 1952​ y ​actualmente tin 5 club miembro​. Nan ta:​

  • Aruba Jrs 
  • SUF Stealers 
  • De ​V​uyst Impact 
  • CEO Dream Basketball 
  • SV Estrella 

​Oficialmente ​Aruba Basketball Bond tin registra mas di 300 atleta cu ta p​a​rticipa den campeonato pero tambe tin esunna​n​ cu ta hunga na diferente parke sin cu ta registra​.​

​Si Bo ta interesa pa hunga basketball, subi e pagina di Facebook di ABB na https://www.facebook.com/ArubaBasketballBond/​ y nan mes lo yuda Bo pa hinca Bo den contact cu un di e 5 ekiponan activo. Probablemente esun mas cerca di Bo cas.​ Basketball ta un deporte di disciplina, hopi accion y movecion, cu ta bon pa bo salud y ta aumenta bo spirito di kier sobresali y gana!​

Comments

comments