Aruba Bank, e unico banco cu ta carga nomber di nos pais a dicidi di partner cu nos planta nacional Tele Aruba, den un esfuerso pa facilita cobertura y transmision di henter e campeonato di futbol di henter e continente Americano. Copa America Brasil 2019 lo ta e di 46 edicion di e campeonato internacional di futbol organisa pa CONMEBOL. E aña aki Brazil ta e anfitrion, mientras cu Chile, cu a titula campeon dos biaha caba, lo ta defendiendo su titulo cu el a gana den e torneonan di aña 2015 y 2016.
Copa America 2019 ta tuma cuminsa for di dia 14 di Juni te cu dia 7 di Juli. Tin un total di 12 ekipo di 2 confederacion participando e biaha aki den 5 ciudad di Brasil, esta Salvador, Rio de Janeiro, Sao Paulo, Belo Horizonte y Porto Alegre.
Pa por oficialisa e momento historico aki, a organisa un ceremonia na Aruba Bank mes, den cual gerencia di e banco a firma e acuerdo di transmision cu gerencia di Tele Aruba. Di e forma aki e comunidad completo di Aruba por ta sigur di mira e transmisionnan di e weganan di futbol aki, cu lo pasa den forma bibo y directo y transmiti localmente pa un panel di comentaristanan y presentadonan local.
Lo hunga e wega inicial den Estadio do Morumbi na Sao Paulo, mientras cu lo hunga e weganan di semi final den e Arena do Gremio na Port Alegre y Estadio Mineirao na Belo Horizonte. Lo hunga e wega final den Stadion di Maracana na Rio de Janeiro.
Paisnan cu ta bay competi den nan respectivo grupo ta Brazil (Anfitrion), Uruguay, Argentina den Grupo 1. Colombia, Chile y Peru lo bataya contra otro den Grupo 2. Venezuela, Paraguay y Hapon lo defende nan honor den Grupo 3, mientras cu Ecuador, Bolivia y Qatar lo participa den Grupo 4.
E mascota di e torneo ta Zizito, nomber pa rindi homenahe na Zizinho, e futbolista Brasileño, cu ta comparti un record di gol den Copa America. Na tur el a hinca 17 gol. E ta un record cu e ta comparti cu e Argentino Norberto Doroteo Mendez.
Aruba Bank ultimo añanan a dedica hopi mas atencion y a patrocina hopi mas organisacionnan deportivo y a promove mas movecion y hacimento di deporte. Como banco, ta convenci di nan responsabilidad social pa sostene tur iniciativa caritativo y cu un meta sano su tras. Deporte como tal ta uni un pais, ta promove disciplina y movecion. Y claro, tur locual ta bon pa e comunidad, ta bon pa e pais, y tur loke ta bon pa nos pais, ta bon pa Aruba Bank!
