Aruba Bank Lady Tigers lo enfrenta Jaguars Vitamin Water den un serie di best out of 3

145

Campeonato fast pitch femenino AA ta den su recta final. Aruba Softball Bond desde 3 di Mei a celebra su gran apertura di su  campeonato HEINEKEN dedica na dos baluarte Jacobo Jansen y Gilbert”Nando” Maduro. Aruba Softball Bond a inicia cu categoria AA y A Klas masculino cual campeonatonan a termina respectivamente final di Juli y inicio di Augustus.

Di acuerdo cu e calendario di ASB campeonato Femenino den categorianan U17 y AA a inicia den Augustus y lo termina den October y asina ta celebra 6 luna intensivo di diferente campeonatonan di fast pitch. Campeonato U17 femenino a termina dos siman pasa mientras diabierna awor lo inicia playoff semi final den categoria AA femenino. Aruba Bank Lady Tigers a termina solido na segundo puesto cu 5 victoria y 4 derota mientras Jaguars Vitamin Water a termina na di tercer puesto cu 3 victoria y 6 derota.

E clasificadonan # 2 y # 3 lo hunga un serie di best out of 3 unda e ganador lo pasa pa final pa enfrenta e fuerte equipo di Eagles kendenan ta invicto den 9 salida y ta sub campeon caba enespera di nan contrincante pa “square off” e serie final pa e titulo maximo. Diabierna awor pa 715pm na Pos Chiquito lo bay tin e promer wega mientras diasabra pa 5pm lo tin e di dos wega di e serie programa.

Weganan den semi final ta programa na 1 ora y 45 minuut y e serie final lo wordo hunga sin time limit. Tur wega lo tuma lugar riba canchanan na Pos Chiquito. ASB ta invita henter pueblo di Aruba pa jega tereno bin apoya Bo equipo preferi. Exito na tur equiponan den Playoff.