Diabierna mainta a tuma luga e apertura di centro di reumatologia na Aruba. Pa Dr. Horacio E. Oduber Hospital esaki tabata un momento historico ya cu awo por brinda e cuido den ramo di reuma cu tabata haci falta di basta tempo caba.
E acuerdo entre Dr. Horacio E Oduber Hospital y St. Maartenskliniek di Hulanda a haci esaki posibel y ta crucial pa por brinda e cuido specialisa unda cu mayoria pashent di reuma awo no ya mester bay Hulanda mas.Sr. Ezzard Cilié, director di cuido di Dr. Horacio E. Oduber Hospital a duna di conoce cu durante e proceso pa desaroya e centro aki a experencia algun contratiempo.
Ya caba na aña 2015 a cuminsa cu e prome combersacionnan riba con pa haci’e y si por haci’e pues si ta algo alcansabel pa Aruba. Sr. Cilié tabata contento pasobra pa comunidad di Aruba awo tin un specialismo medico adicional cu no tabatin antes. Den e sentido ey e ta algo historico y por bira mas grandi ainda ora cu otro islanan tambe desea e servicio ey for di Aruba.
A cuminsa cu e centro aki p’e comunidad Arubiano, pero si por yuda otro islanan, lo haci esey tambe. Esaki ta un paso hopi grandi unda cu un specialismo nobo a wordo introduci cu sosten di St. Maartenskliniek, un clinica reconoci di Hulanda riba e tereno aki. AZV tabata manda su pashentnan di Aruba pa e clinica aki na Hulanda pero aworaki Hospital por brinda mesun servicio akinan mes na Aruba unda cu lo brinda mesun nivel di specialismo ya cu ta tene mesun protocolnan y proceduranan cu St. Maartenskliniek na Hulanda.
E intencion ta pa den futuro sigui desaroya mas riba e tereno di reuma, asina sr. Cilié a duna di conoce.
A cuminsa traha 3 aña pasa riba e proyecto aki, unda cu sr. Cilié a pidi pa traha hunto pa bin cu un centro di reumatologia na Aruba mes, asina sr. Gert van Enk, di Hunta di Directiva di St. Maartenskliniek na Nijmegen, Hulanda a duna di conoce. Na Hulanda ya Sint Maartenskliniek tin 5 localidad den diferente ciudad y diferente specialisacion. A traha 3 aña largo riba e desaroyo di un centro na Aruba y despues di un cooperacion extenso finalmente a logra realisa esaki awe.
Prome cu a habri e centro di reumatologia aki tabatin dr. Waterloo cu a percura pa e parti di reumatologia atendiendo mayoria di pashentnan cu reuma. Actualmente tin dos specialista cu t’ey temporalmente te januari y despues lo tin e specialista fiho pa reuma. Tur ta wordo educa y ta haya guia door di St. Maartenskliniek. E specialistanan aki lo haci uzo di tur protocol di Hulanda, unda cu e specialistanan di reumatologia na Nijmegen lo tin bon bista pa garantisa cu e cuido na Aruba ta di e mesun nivel y calidad cu esun di Hulanda. Pabien Aruba cu un otro paso grandi den cuido medico!
