Diabierna, 21 di Juni 2019, pa 5:30pm ta cuminsa e evento Harry Janssen National Championship cual pa di 56 aña ta wordo organisa pa Aruba Athletic Federation.
E evento lo tuma lugar na Compleho Deportivo Guillermo Prospero Trinidad caminda lo desplega diferente disciplina di Track and Field. Tambe lo tin Throwing events na Centro Deportivo Betico Croes. E evento lo sigui diasabra 22 di Juni di 9:00am te cu 11:00am y tambe parti atardi di 5:30pm pa 9:30pm.
Aruba Athletic Federation su directiva nobo ta trahando riba tres pilar pa fortifica e deporte di atletismo na Aruba. Pa trece 2 coach internacional specialisa p’asina nan por yuda entrena e atletanan pero tambe pa fortifica e nivel di e coachnan local cu ta traha masha duro cu atletanan.
“Nos ta formando un programa cu e scolnan y den combinacion cu COA su Talent Identification Program nos lo crea mas posibilidad pa mas mucha practica atletismo. Hunto cu Ministerio di Deporte nos ta trahando riba un ubicacion pa traha un stadion Track & Field nobo pa por practica mihor y organiza evenementonan internacional na Aruba. Nos ta convenci cu aplicando e strategia aki nos lo fortifica atletismo na Aruba.”
Aruba Athletic Federation ta invita Aruba henter pa bin dia 21 y 22 di juni na Compleho Deportivo Guillermo Trinidad y tambe na Centro Deportivo Betico Croes pa sostene e participante nan y tambe wordo inspira pa cuminsa den e deporte aki.
