Awe mainta a tuma luga cortamento di cinta na Hyatt Place Aruba Airport, inaugurando asina e prome espacio den Aruba Airport Hotel & Business Center, un centro di negoshi cu lo inclui banda di e hotel varios otro facilidad pa e huesped cu ta bishita Aruba pa trabou pero tambe e empresario local, cu ta busca un luga trankilo y central pa establece su negoshi of reuni cu cliente.

E compania desaroyado di e proyecto, Pelca Development Comany, ta consisti di e gruponan inversionista Pellizzari y Cano. Ambos grupo ta reconoce e gran potencial pa haci negoshi na Aruba y na momento cu a presenta e oportunidad pa desaroya e proyecto di Aruba Airport Hotel & Business Center, nan a acepta e oportunidad y e reto sin ningun duda.

Aruba Airport Hotel & Business Center: Orguyoso di e inauguracion di Hyatt Place Aruba Airport

Aruba Airport Hotel & Business Center: Orguyoso di e inauguracion di Hyatt Place Aruba Airport. Click link pa mas https://24ora.tv/2Mm9PIc

Posted by 24ora on Wednesday, October 16, 2019

E proyecto a inicia den su fase di planificacion y desaroyo den tur disciplina den aña 2016 y na januari 2017 e acto protocolar a tuma luga caminda a eleva e prome columna di e edificio. Den un tempo record di 2 aña y mey e Pelca a completa e proyecto, cumpliendo cu tur rekisitonan di siguridad, tecnico y estetico. E no tabata un tarea facil pero sin duda Pelca Development Company ta sumamente orguyoso di por a entrega e prome fase di e edificio pa asina haci e inauguracion di Hyatt Place Aruba Airport posibel.

Cu e inauguracion di Hyatt Place Aruba Airport ta inicia tambe un era nobo di haci negoshi na Aruba. E edificio tin un diseño arkitectonico moderno cu un estilo vanguard. A incorpora elementonan di e isla den e diseño y a percura pa uza e materialnan di mas innovativo riba mercado. E concepto di e edificio den su totalidad ta inclui banda di e hotel, un espacioso “foodcourt” aire acondiciona, un area cu diferente tienda, spa y salon di beyesa, un banco comercial mas cu 5000m2 di oficina y un piso completo cu e concepto di “Open Office Space”.

Cu e concepto aki cada bishitante corporativo por hospeda den un hotel di renombre internacional y tin tur facilidad bou di un solo dak. Pa e clientenan local Aruba Airport Hotel & Business Center ta ofrece e oportunidad pa haci negoshi den un ambiente moderno y eficiente. Hyatt Place Aruba Airport, combina cu e centro di negoshi Aruba Airport Hotel & Business Center lo ta sin duda un formula exitoso pa Aruba y lo set e standard pa centronan di negoshi den region Caribense. Mester remarca cu General Manager di Hyatt Place Aruba Airport ta Marta Raven, un Arubiano cu un trayectoria largo den mundo di hoteleria.

Comments

comments