Aruba Airlines ta suspende vuelonan entrante diabierna y hopi trahado lo bay cas

E falta di interes di gobierno pa busca un solucion bon reglamenta pa por permiti cierto vuelonan for di Venezuela ta causando un situacion hopi serio pa diferente compania cu ta trahando na aeropuerto. No ta solamente na Aruba Airlines y W Aviation e ta causando problema serio y peliger pa e pan di e trahadornan. E cierre di e frontera aki ta causando cu hopi trahador ta bayendo cas. E ta haciendo cu dos compania grandi na airport y cu tin mas cu 250 trahador ta den problema. E trahadornan ta birando desespera.

Trahadornan kier paralisa trabou pasobra nan ta sinti cu gobierno no ta atendiendo e asunto cu tur seriedad y nan trabou ta na peliger. A wanta basta pero no por wanta mas. Awor pio cu a anuncia cu ni di transito por pasa Aruba for di Venezuela, no por carga e gastonan di persona. E dos diferente companianan cu tin hopi empleado trahando riba rampa, ta evaluando pa paraliza tur trabou. Esey nifica cu e avionnan cu baha for di cualkier destinacion no ta wordo atendi y nan lo keda pega riba rampa cu tur nan maleta y otro asuntonan cu mester keda regla ora cu nan baha te ora nan subi. E dos companianan aki ta handle tur e avionnan commercial cu baha.

Aruba Airlines mientrastanto entrante diabierna ta suspende su vuelonan existente. No ta bay bula entrante diabierna ni ABC. Nan tin como 200 trahado y probablemente nan mester bay cas. W Aviation tambe tin hopi trahado y nan trabou a cay cu 60% pasobra e vuelonan di avion priva no ta yega di pazuid. Gobierno ta keda esun responsabel pa e situacion aki. Despues cu a palabra y hasta conseho di minister a manda carta pa dos compania cu lo habri e frontera pa cierto vuelo, diripente prome minister a bisa cu e no conoce e carta ey. Djey a bisa tambe cu e frontera ta keda cera. Dimes esaki ta causa un problema grandi. Ta hopi vuelo di Venezuela ta handle. No ta esun di Aruba Airlines of cu ta yega na W Aviation so. Mientras a manda hopi hende di rampa cas caba, ainda tin mas cu por perde trabou. Pesey mes e trahadornan ta menazando pa paralisa tur cos y asina gobierno mira e seriedad di e situacion.