Aruba Airlines no tin nada di haber den caso di ciudadanonan Cubano expulsa for di Cuba

Na comienso di e luna aki, Aruba Airlines a enfrenta acusacionnan falso den prensa internacional riba un caso unda activistanan Cubano a keda expulsa for di Cuba pa motibo di protesta contra e Gobierno Cubano.

E acusacionnan aki di parti di e abogadonan di “Kivaki Law Firm” y e organisacion di “Cuban Prisioners Defenders” ta tilda Aruba Airlines como complice di e Gobierno Cubano ya cu 2 persona di e grupo di 77 Cubanonan afecta, a yega nan destino final na Georgetown, Guyana, riba vuelo di Aruba Airlines. Aruba Airlines ta desmenti e acusacionnan aki completamente y a indica tambe cu  no lo tolera ningun tipo di difamacion di parti di e organisacion y abogadonan corespondiente na e caso aki.

Mucho menos nos lo permiti pa e caso aki afecta e reputacion di pais Aruba como destino turistico.

Detaye di pasahero y vuelonan

Gerencia di Aruba Airlines ta conta cu varios prueba palpabel cu ta comproba contrario di loke e pasaheronan a reporta, entre nan, number di reservacion di pasashi y e comprobante di compra di e “e-ticket” di e pasaheronan cu a wordo adkiri pa medio un agencia di biahe na Cuba y via un call center na Miami. Segun informacion avansa recauda via e sistema digital ‘RESIBER’ ambos pasahero Cubano a presenta di manera boluntario na balie di aeropuerto y sin ningun acompañante of representante oficial.

Ademas, ta confirma cu ambos pasahero a ricibi nan “boarding pass” y a pasa pa tur punto di control exitosamente mediante e sistema local di salida na terminal 2 di Aeropuerto Internacional Jose Martí.   Un otro aspecto importante pa ta trece dilanti y clarifica ta cu tur asunto migratorio, sea un caso di “deportacion” of  explusion di un persona for di su pais, ta conta cu procesonan specifico realisa pa entidadnan di e departamentonan di Gobierno concerni.  Den e caso di e dos pasaheronan Cubano, no solamente nan a presenta na balie di aeropuerto di manera boluntario, pero tampoco ningun personal di Aruba Airlines riba tera, piloto of stewardess a wordo notifica na ningun momento di un caso/proceso oficial lo tuma luga. Personal di Aruba Airlines cu a forma parti di e vuelonan aki ta sigura tambe cu na ningun momento nan a haya informacion cu ta indica cu nan tabata den un situacion unda cu un pasahero tabata presencia un violacion di su derechonan humano.

E mundo di aerolinea awendia ta strictamente regula, cu e ta practicamente imposibel pa un aerolinea funciona of comete un acto ilegal di transporta un persona di un forma forsoso, aborda un persona riba pleno pista, maltrata pasaheronan riba avion/durante vuelo of bandon’e na un otro pais manera cu ta wordo acusa durante e caso aki.

Plan di accion

Actualmente tur documento, informacion y prueba recauda desde cu e acusacionnan aki wordo haci ta den man di e abogado cu ta representa Aruba Airlines internacionalmente, pues un carta di “Cease & Desist” a wordo manda pa e abogadonan di “Kivaki Law Firm” y e organisacion di “Cuban Prisioners Defenders” pa nan rectifica riba e acusacionnan aki publicamente.

Entre varios otro aerolinea cu ta realisa vuelonan entre Havana, Cuba y Georgetown, Guyana, Aruba Airlines ta e unico cu a wordo menciona. “Nos ta considera e accionnan aki como un acto di difamacion como tambe un intento pa daña e imagen di nos compania.  Nos tin bista riba e situacion aki hopi di cerca y den caso cu e rectificacion publico no tuma luga, nos ta cla pa tuma pasonan legal pa daño y perhuicio”, asina Gerencia di e aerolinea a indica.

Aruba Airlines orguyosamente ta representa e aerolinea local di Aruba, operando exitosamente pa 6 aña caba cu vuelonan regular pa Barquisimeto, Boneiro, Curaçao, Havana, Georgetown, Maracaibo, Miami y Valencia. Tur vuelo y operacionnan ta cumpli cu standardnan global pues nan ta wordo regula pa “International Air Transport Association” (IATA), como tambe pa “International Civil Aviation Organization (ICAO).

“Nos ta para firme pa ofrece siguridad, eficiencia y sostenibilidad aereo na nos pasaheronan y nos ta confirma cu nos no tin nada di haber di e caso di e 2 pasaheronan Cubano, ni tampoco nos ta complice di e Gobierno Cubano pa cu e caso aki. Nos lo sigui cumpli cu e standardnan aereo y di siguridad manera leynan local y internacional ta stipula”, asina e representante di e aerolinea local a sigura.