Aruba Airlines cu un adicion nobo na su flota di avion

E avion cu Aruba Airlines a haya diahuebs, a bin pa reemplasa e avion Voyager. Ta trata aki di un CRJ200ER di fabricacion Canades, door di e compania Bombardier. Cu capacidad di 50 stoel, e tin compartimento di carga un tiki mas grandi cu e otro CRJ cu ta bulando pa casi un aña caba riba e ruta di Aruba, Boneiro y Corsou.

Franklin Krozendijk, Ground Operations Director y tambe Deputy Accountable Manager di Aruba Airlines, a duna di conoce cu e idea ta pa e avion reemplasa e otro mirando cu nan tin un permiso te cu dia 31 di Juli pa bula un wetlease. Mester keda cla cu tur e testnan cu tin cu haci prome cu dia 31 di juli pa por tuma over e rutanan nan mes.

Aruba Airlines cu un adicion nobo na su flota di avion

Aruba Airlines cu un adicion nobo na su flota di avion. Click link pa mas https://24ora.tv/2MYkvPA

Posted by 24ora on Friday, June 14, 2019

E avion aki, ta registra P4-CRA, cu ta nifica cu e ta registra na Aruba. Esey ta duna Aruba Airlines full control riba nan vuelonan. Nan ta dicidi si tin charter pa bula, si tin un peticion pa un vuelo extra, nan mes ta bay dicidi riba esaki. Importante pa sa ta cu door cu e ta di un registracion P4, ta den nan control tambe, ta habri oportundidad pa pilotonan di Aruba y si tin mester tambe, ta tuma di Corsou y Boneiro cu ta cualifica. Aruba Airlines tin oportunidad pa 8 tripulante di cockpit y 6 di cabina.

Ademas, e avion aki, door cu ta un P4, ta entrena nan propio mecaniconan local. Esey ta un otro oportunidad di trabao cu a crea. Nan tin nan propio hendenan local pa mantencion semanal y diario. Y si tin trabaonan mas grandi pa eherce, nan ta manda e avionnan na un instancia di Mexico, cual ta aproba pa departamento di Aviacion.

Operacional

Comercialmente, e avion aki ta bay keda cla ora cu haya certificacion. Esey ta bay tuma luga dia 26 di Juni, cu nan ta bay haci e touch & go’s. Actualmente Aruba Airlines tin e di dos set di grupo ta bay Berlin awe, diabierna, pa haya nan entrenamento den e tipo di avion aki. Nan no tin’e ainda. Nan tin cu wordo certifica. Ora cu nan tambe bin, nan tambe tin cu cumpli cu touch & go’s, cual ta tres pa cada uno.

E flota

E flota actualmente tin 3 Airbus 320 y nan tin e CRJ200. Aruba Airlines ta cla pa expande, pero ta haci’e den fase. E mercado grandi di Venezuela, actualmente door di ciere di frontera no ta operando nan ruta di Miami. Aruba Airlines tin plan si pa expande cu rutanan manera di Barranquilla. Por ta pa aki tres luna por keda cla pa cuminsa bula e ruta aki. Nan tin e ruta di Miami wanta. No a cancel’e. E ta on hold cu autoridadan Mericano, cu den cualkier momento cu e mercado Venezolano bin aden, Aruba Airlines ta bay sigui cu e ruta aki. Automaticamente tur avion ta ocupa. Mester bay busca un otro Airbus 320.

Vuelonan

Dia 27 di Juni, Aruba Airlines a firma cu un contract cu un tour operator. Ta bay cuminsa pa dos siman, ta bay cuminsa bula tres vuelo semanal pa nan, entre Miami y Haiti. Despues di dos siman ta bay cuminsa bula tur dia pa nan. Tur dia nan ta bay opera Miami – Port-au-Prince – Miami. Pa loke ta Europa of Hulanda, ta den pipeline ainda, pero no pa e aña aki mas. E posibilidad tey cu nan por expande pa Europa tambe.