Aruba a pidi 1.3 biyon pero CAft ta conseha pa fia 43 miyon so!

4787

Den un carta dirigi na Presidente di Conseho di Minister di Reino, Mark Rutte, CAFT ta conseha pa otorga un sosten di likides di 42,8 miyon florin den forma di un fiansa cu Aruba mester paga bek den 2 aña. Esaki ta contrario na e 1.3 biyon florin cu Aruba a pidi siman pasa, di cual mas cu mita lo tabata un donacion. E 42,8 miyon florin cu CAFT ta conseha pa fia como asistencia financiero inicial ta mara na condicionnan comparabel na un curatela financiero. Aruba mester raporta mensualmente riba tur e entradanan y gastonan cuminsando for di maart 2020.

Si Aruba kier bin nan remarca pa mas ayudo financiero, lo mester presenta un plan concreto pa reduci gastonan coriente di Gobierno, manera gastonan di personal, gastonan di operacion, subsidionan y otro gastonan, e.o. pa Fondo di Asistencia Social di Emergencia (FASE), pa asina reduci e deficit di 1.3 biyon florin mas cu ta posibel.

Prome cu 1 di mei, Aruba lo mester presenta un plan completamente nobo pa duna subsidio na empresanan por paga nan trahadonan garantisando e empleo di e trahadonan. Den poco palabra, Hulanda lo no contribui di ningun forma na cubri gastonan di FASE manera presenta y cualkier ayudo financiero lo bin den un forma di fiansa. Dia 24 di maart gobierno a haci un peticion pa un total di 1.3 biyon florin di cual 500 miyon florin lo mester tabata den forma di donacion, mas un fiansa di 500 miyon florin, como tambe 300 miyon florin pa cubri e gastonan di Fondo di Asistencia Social di Emergencia (FASE).

CAFT ta splica cu Gobierno a basa su peticion riba un worst-case scenario sin tene cuenta cu e efectonan secundario cu por crea mas problema financiero riba termino mediano. Gobierno a anuncia varios fondo pa alivio y sosten financiero, pero te awor no mucho claridad riba e procedimiento. Tampoco Gobierno no a splica ki tipo di inversion lo e ehecuta cu e 20 miyon di florin aproba den prespuesto 2020.

Aunke cu CAFT ta compronde e intencion di duna asistencia y alivio financiero, nan ta bisa cu e asistencia mester wordo otroga na e dunado di trabou pa asina e por garantisa empleo di e trahado y cu primanan ta wordo paga na e fondonan social pa esakinan keda solvabel. Cu creacion di Fondo di Asistencia Social di Emergencia (FASE), Gobierno ta promove pa trahadonan wordo kita di trabou como cu nan lo por bin na remarca pa 950 florin di Gobierno.

CAFT ta pidi tambe pa den un proximo peticion pa e pronosticonan di SVb y AZV wordo revisa debidamente. E colegio di supervision financiero a tuma nota di intencion di Gobierno pa reduci salarionan di mandatarionan cu 10% y introduci un tipo di solidariteitsbelasting pa por cubri e gastonan di desempleo den sector priva.

Contrario na Aruba, Corsou si a ricibi e sosten di likides cu a pidi. Mientras cu Aruba a haña casi 43 miyon florin, Corsou a ricibi un suma total di 177 miyon florin. Por a tuma nota di un carta firma pa Hellen van del Wal, miembro di CAFT apunta pa Gobierno di Aruba, cu ta distancia su mes di e conseho aki como cu e demas miembronan di e colegio no ta tuma cuenta cu e aspectonan Caribense y e solidaridad cu mester existi entre e paisnan di Reino Hulandes.

Loader Loading…
EAD Logo Taking too long?

Reload Reload document
| Open Open in new tab

Download [237.69 KB]