Recientemente a yega Aruba container cu un cantidad grandi di material pa les di gymnastiek na scolnan di Aruba.
Awe mainta a tuma luga e ceremonia di entrega di e material aki na gobierno unda tabata presente minister di Enseñansa Armando (Rudy) Lampe.
E mandatario a splica cu persona- y organisacionnan na Hulanda ta recolecta material segunda mano cu scolnan na Hulanda a “schrijf af”. Hulanda tin recurso financiero pa cada tanto tempo ta cumpra material nobo. Pero loke nan ta deshaci di dje ta materialnan di bon calidad. “Pa Aruba e ta un ayudo hopi grandi cu nos por ricibi nan pasobra realmente e scolnan por haci bon uzo di e materialnan.”
Ta cuminsa pa reparti durante dos dia material na e scolnan cu ta den necesidad y e restonan ta bay deposito pa momento cu otro scol tin necesidad di material. Pa e proyecto aki a gradici Leo de Hertog, kende ta e motor tras di esaki.
Den transcurso di aña a ricibi diferente container cu material pa les di Movecion y Salud, pero tambe cu banki y stoelnan. Esun di awe ta e ultimo container di e aña’ki. E material den su mayoria ta bay pa e scolnan special.
