Aruba a habri siman surpasando 500 caso activo di Covid-19

5307

Di acuerdo cu cifranan oficial di Departamento di Salud Publico (DVG), 711 persona a test entre ayera diadomingo pa awe dialuna mainta, di cual 67 a test positivo pa Covid-19, esey ta algo menos cu 10% di e total. Esey ta hiba nos na 513 caso activo awe dialuna, e cifranan mas halto di casonan activo den henter e pandemia. Te ainda no tin mas recuperacion, mescos cu ayera, awe ainda tin 114 persona cu a sobrebibi Covid-19 y ta completamente cura.

Despues di mas cu 4500 test haci y mas cu 450 caso positivo por conclui cu tur esnan cu a keda contagia den “Hot Zone” a wordo identifica y a wordo isola. Awor ta sigui indentificacion di e “tweede kring” cu ta encera esnan cu por a keda contagia pa esun cu tawata den “Hot Zone”. Esakinan ta encera den gran parti esnan cu ta biba den cas (bou mesun dak) cu e persona positivo y tambe e pareha di e persona positivo. E personanan aki ta esnan mas na risico y pa cual motibo e personanan aki lo mester bay den cuarentena.

Atravez di “contact tracing” Departamento di Salud Publico lo tuma contacto cu esnan cu ta biba cu un caso positivo y lo duna tur instruccion nesesario. Esnan cu por a comparti un rato cu un persona cu despues a resulta positivo ta wordo instrui pa tuma tur medida di prevencion necesario na tur momento. E personanan aki no ta bay den cuarentena, por sigui traha normal cu e condicion cu nan ta aplica tur protocol estrictamente y na prome indicacion di sintoma ta tuma contacto cu nan dokter di cas.

Un suplica ta bay na comunidad pa no yama e nr 280.01.01 pa haci pregunta. E number aki ta estrictamente pa yuda den e brote aki, unda persona cu sintoma y cu mester wordo getest por haya ayudo mas lihe posibel. Si bo no tin sintoma bo persona lo no wordo getest y si bo ta pensa cu bo por tin e virus pasobra bo tawatin contacto cu un persona positivo. Aplica tur medida di higiena entre otro bo “mondmasker” y e dia cu sintoma parece ta yama dokter di cas pa por hasi un test.

E proceso normal ta encera cu un persona cu sintoma ta yama su dokter y cas y dokter di cas ta percura pa su pashent por test na laboratorio di hospital. Tene cuenta cu e test ey ta cubri pa AZV y ta haya resultado e mesun dia of su siguiente dia.

Den e brote aki centro diagnostico di DVG a yuda pa maneha e brote y awor cu e brote di “Hot Zone” a wordo mitiga y tur persona indentifica nos ta bay bek na sistema y maneho normal unda dokter di cas ta atende su pashentnan cu tin sintoma.