Cu hopi celebracion y emocion, awe e crucero Celebrity Millennium di e compania Celebrity Cruises a drenta waf di Oranjestad atrobe. E ta e prome crucero cu ta yega nos isla bek cu pasahero abordo, despues di 15 luna cu e industria tabata practicamente inactivo. E crucero a sali for di Sint Maarten y ta pasa Barbados, Aruba y Corsou, pa despues regresa Sint Maarten atrobe. Cu esaki Aruba ta parti di e prome itinerario atrobe den henter Caribe desde cu COVID-19 a causa un paro den e industria crucero.
“Lo no tabatin un miho momento, manera esaki pa celebra e hecho cu APA ta celebrando 40 aña di existencia e aña aki. Kisas si no tabata pa e evento di awe, lo no tabatin mucho motibo pa celebra. Pero cu e yegada di un crucero awe, despues di 15 luna, ta un recordatorio pa henter nos personal y henter nos pueblo, cu turismo semper lo bounce back y waf den esaki semper a y lo sigui hunga un rol crucial”, asina Marc Figaroa, managing director di Aruba Ports Authority N.V. a bisa den su discurso na ocasion di e ceremonia cortico di recepcion di e prome crucero atrobe despues di e pandemia. “Nos a haci bon uzo di e temporada pa internamente nos adapta nos maneho, e protocolnan di salud, actualisa nos relacion cu partnernan strategico den e industria y awe por mira e resultado. Asina cu a cuminsa nabega atrobe, Aruba ta parece como prome den e iterinario”.
Pa awo, Celebrity Millennium lo bishita Aruba pa e luna di Juni y despues lo remplasa esaki cu Celebrity Summit pa Juli y Augustus. Nan tambe mester a adapta tur nan protocolnan di salud hunto cu e instancianan di salud di Merca y tur e islanan unda nan ta bishita den nan iterinarionan. Pa awo e cruceronan lo start den fase y cu capacidad reduci pa garantisa espacio natural. A introduci mas tecnologia moderno pa adapta nan proceduranan ora di check in y ora di bandona e crucero. Por confirma cu full e tripulacion y tur pasahero riba 18 aña ta vacuna completamente.
Awo cu e huespednan y tripulantenan ta traha hunto pa promove siguridad y aspectonan di salud, a haci cu a yega na protocolnan nobo, cu ta inclui:
- Nabegacion vacuna – E crucero lo nabega den Caribe cu henter su tripulacion vacuna y por lo menos 95% di e pasaheronan tambe vacuna.
- Yegada y salidanan – Yegada y salidanan na e terminalnan lo sosode separa di otro, pues lo duna tur pasahero un ora exacto pa e yega. Asina e huespednan tin opcion pa yega nan mesun orario, basa riba nan plannan di vakantie.
- Transaccionnan sin contacto – E mobile app digital di Celebrity ta transforma e conocido “safety drill” di gruponan grandi di pasahero, den un experiencia personal cu e pasahero por haci den su celular mes, pa evita aglomeracion. Lo uza e mesun app aki tambe ora di aborda e crucero, pa lesa menu y hasta pa reserva un orario specifico pa come den restaurantnan of pa reserva tournan na tera.
- Tapaboca ora mester – Durante e proceso pa check-in y check-out den e terminalnan, lo exigi tur pasahero, desde 2 aña di edad bay ariba, pa tin un tapaboca bisti. Asina cu subi abordo, solamente si e ta otro instrui door di gobiernonan local, lo no exigi pa tin tapaboca bisti. Esey ta di acuerdo cu e reglanan di CDC pa nabegacion completamente vacuna.
“Turismo ta e pilar number uno di nos isla y nos tur a nota e importancia di e industria di crucero den nos economia, awor cu esaki tabata inactivo pa mas di un aña. Awo nos ta den e proceso di recuperacion y mescos cu ta sosodiendo cu aerolineanan, awor nos ta enfoca tambe riba e liñanan crucero pa yega nos isla atrobe. Nos a traha duro pa por tin tur protocol di salud na ordo, pa hunto cu e liñanan di crucero nos percura pa bienestar di tur nan pasaheronan, nan tripulacion y sin lubida nos pueblo tambe”, asina Dangui Oduber, Minister di Salud Publico, Turismo y Deporte, a duna di conoce na ocasion di yegada di e prome crucero atrobe den waf di Oranjestad.
“Mi a bisa di un prome instante caba, cu Aruba lo sali mas fuerte y resiliente for di e crisis aki. Nos tabata e pais mas afecta den e pandemia door cu nos ta depende totalmente di turismo, pero mi ta para firme cu nos lo bira tambe e pais cu lo recupera mas lihe, pasobra despues di pandemia, nos ta keda un di e islanan mas preferi den Caribe y sigur mas bunita, cu hendenan mas cordial y cu e beachnan di mas bunita na mundo. Cu yegada di e cruceronan, Aruba ta cuminsa su recuperacion completo”, segun Minister Dangui Oduber.
“E ruta pa reapertura di e industria di crucero, den forma sigur y exitoso, pa promove recuerdonan pa bida di vakantienan unico, ta hiba Celebrity Cruises na hopi destinacionnan fascinante y sin ningun duda Aruba ta resalta como un destinacion popular y masha gusta pa nos ranca sali den nos temporada di zomer”, asina Brian Abel, senior Vice President di Hotel Operations di Celebrity Cruises, a bisa. “Nos lo no por haci historia den e industria di crucero sin e cooperacion di Aruba y sin nan insistencia pa anticipa tur oportunidad pa incorpora e cultura unico bonbini den e experiencia di nos pasaheronan den iterinarionan adicional”.
E logro aki, esta pa Aruba ta inclui den e prome salida di cruceronan den Caribe no a sosode pa casualidad. Ta hopi dianan di negosacionnan continuo, trabou duro di trahadonan di APA hunto cu DVG riba e protocolnan di salud, atende tur asunto di nabegacion cu Directie Scheepvaart y fiha un strategia turistico hunto cu Ministerio di Turismo y ATA pa awor Aruba por ta para na e momento aki. “Mi no por keda sin subraya nos tremendo relacion cu Royal Caribbean Group, cu ta e compania encarga cu e lineanan Celebrity Cruises, Royal Caribbean International y Silver Seas. Nan a experencia nos seriedad y mas cu tur cos, nos compromiso pa cumpli cu tur regla y na mes momento pa ta anfrition di huespednan cu ta pura pa nabega y bay cu vakantie atrobe”, di acuerdo cu Marc Figaroa.
