Aruba a gana “bid” pa organisa asamblea general di Basketball otro aña

166

Despues di un reunion cu a dura no menos di 8 ora largo na Dominica, den reunion di Caribbean Basketball Federation, a bin e proceso di “Bid” oficial pa ta anfrition di e asamblea general di Caribe y Centro America na luna di maart 2021. Aruba Basketball Bond a gana e bid y como tal lo tene e asamblea general aki otro aña aki mes na Aruba!

Esaki ta bira e prome reunion general di FIBA/CBC organisa dor di organisacion di basketball na Aruba. Tur hende a keda satisfecho cu un aña adelanta directiva di basketball di Aruba, bou presidencia di Kenneth Vrolijk, ya tin tur cos cla pa “host” e asamblea aki na aña 2021. Esaki ta un muestra mas cu Basketball na Aruba ta hayando e reconocemento internacionalmente y FIBA ta reconoce cu Aruba su basketball ta bayendo den e direccion desea.

E delegacion di Aruba a consisti di Kenneth Vrolijk como Presidente di ABA, cu a bay compaña pa su colega Ivan Poulina, durante e reunion na Dominica.

Kenneth Vrolijk ta encabesa e federacion di basketball na Aruba desde september 2019. For di 2017 e ta den directiva pero aña pasa el a tuma e timon over y na mes momento a bira miembro di e comision di desaroyo di deporte mundial di Federacion Internacional di Basketball (FIBA). Su entrada den e federacion mundial ta duna Aruba hopi mas oportunidad y acceso na fondo pa desaroyo, conocemento y ekipo.​

A funda Aruba Basketball Bond ​dia 26 di ​j​anuari ​na aña 1952​ y ​actualmente tin 5 club miembro​. Nan ta:​

  • Aruba Jrs 
  • SUF Stealers 
  • De ​V​uyst Impact 
  • CEO Dream Basketball 
  • SV Estrella 

​Oficialmente ​Aruba Basketball Bond tin registra mas di 300 atleta cu ta p​a​rticipa den campeonato pero tambe tin esunna​n​ cu ta hunga na diferente parke sin cu ta registra​.​

​Si Bo ta interesa pa hunga basketball, subi e pagina di Facebook di ABB na https://www.facebook.com/ArubaBasketballBond/​ y nan mes lo yuda Bo pa hinca Bo den contact cu un di e 5 ekiponan activo. Probablemente esun mas cerca di Bo cas.​ Basketball ta un deporte di disciplina, hopi accion y movecion, cu ta bon pa bo salud y ta aumenta bo spirito di kier sobresali y gana!​

Comments

comments