Artistanan hoben subiendo mercado cu exitonan un tras di otro. Ta pa e motibo aki 24ora.com a haci entrevista cu algun di nan awe pa asina haya un bista di kico tin tras di produccion y ken tur ta envolvi na momento di saca un cancion nobo.
Christopher Stamper “ Kriss Y.O” ta compositor y cantante di e cancion nobo “Bay” ta duna un poco di con e cancion aki a forma. Despues di a scucha e beat e tabata sa cu esey ta esun cu lo bira e siguiente cancion cu nan lo lansa. A cuminsa traha riba letra mientras anochi a cera. Na momento cu a yega cas a bin colaboracion cu su ruman muhe Aymee Stamper “May” cu a colabora cu e resto di letra cu a nace despues di un experiencia personal cu a socode cu ne.
Akinan a nace e idea pa yama Rawy y cada un aporta un parti den e cancion aki y pone nan sentimento personal den e cancion. Manera cada cancion di Kriss Y.O ta algo cu ta sali di curason y asina ey ta canta cada cancion.
Ultimo exito cu a bira un sensacion riba rednan social, particularmente riba Tik Tok tabata e cancion “ Tene mi na Liña” cu tabata acompaña cu un baile cu a bira un “trend” grandi tur caminda. Kriss Y.O ta conta tambe cu e tin hopi mas cancion, nan ta available riba sound cloud bou di Biggy Boy Records cu ta e compania cu e ta pertenece na dje. Idea ta pa colabora cu mas talento hoben local pa yuda mas cu ta posibel sigui crece.
Mientrastanto e siguiente produccion ta den planificacion caba, cual ta un love song cu yama “Di bo mi kier ta” cu ta pensa di sak’e aki tres siman. Intencion ta pa keda diverso pa locual ta estilo. No ta unicamente cancionnan romantico so kriss Y.O ta canta pero lo produci diferente estilo pa complace e diferente genero.
Richene Besselink “Rawy” ta conta cu a conoce Kriss for di club y tabata admira su talento pa canta, for di akinan a cuminsa un amistad y a presenta e idea pa graba un cantica hunto.
Rawy ta conta cu algun luna pasa a sali e cancion “Kico a pasa” cual ta mi segundo cancion produci akinan na Aruba. E cancion cu actualmente a caba di saka bou nomber di “Bay” a nace mientras tabata trahando riba otro proyectonan na momento cu Kriss a yama y puntra si e ta desea di colabora riba un cancion nobo cu e tin.
Na momento di canta, ta algo cu e ta haci’e cu sentimento y expresa su mes den su canticanan y cu esey el a aporta den e cancion. Cu ta algo cu el a pasa aden y ta comparti esaki den cancion. Mayoria inspiracion ta sali di experiencianan personal cu ta bira letra y crea bida den cada cancion y of produccion. Bo ta conecta cu bo fan , cu e publico cu na momento di canta bo cancion e tambe por sinti esaki. Mensahe di Rawy ta si bo tin un soño bay pe, no laga nada stroba bo y si bo cay bo ta lanta mas fuerte.
Marver Guedez “ A+ “ cu tambe ta forma parti di e produccion di e cancion nobo aki ta conta un poco di con el a cuminsa. Ta for di un edad basta jong a cuminsa dedica su mes na musica. El a bay les di cuarta cu su seis aña di edad, cu edad di 12 a cuminsa toca steelpan y cu contractnan na hotel a logra yega na fondo pa traha su studio.
A cambia direccion y for di akinan a cuminsa dedica su mes na produccion di musica. Pa locual ta trata e cancion nobo cu nan a caba di lansa. E beat y estilo lo mester tabata algo romantico. Pero A+ tabata trahando riba un beat estilo “trap” cu durante anochi el a hinca den otro sin cu nan tabata sa. Como sorpresa el a pone e beat den speaker duro y lanta nan for di soño. Mes ora tur a sali bula for di cama y afirma cu esey ta e beat. For di eynan tur e resto a sigui, tanto letra, coro y demas.
Na momento cu un cantante acerca su persona e ta purba semper na guia e cantante, e version final ta den mente caba y e meta ta bira un team work pa logra esaki. E Generacion ta hopi talentoso y ta mira hopi artista formando y riba bon caminda cu guia di hobennan cu ta logrando exito rond mundo manera T-drick y Jeon cu ta esnan cu ta brinda nan sosten y ta fungi como coach pa nan.
Pa finalisa cada un di e hobennan aki ta gradici na fans, nan famia, amistadnan cu ta brinda nan e sosten y ta share nan canticanan. Y ta apoya talentonan locual pa sigui kere den nan soño y bringa pa nan meta. Danki.
