Tin un preocupacion cu ta reina. E tin di haber cu placa di pueblo cu ta wordo usa pa promove conferencianan cu tin di haber cu droga.
Esey ta preocupa parlamentario di AVP, mr. drs. Arthur Dowers. E ta splica cu e reunion den parlamento cu a anuncia mas tempran, ta e competencia di cheerleaders entre MEP y POR. Ministernan cu ta falta respet na parlamento door di no contesta preguntanan por escrito, a presenta, sin contesta e preguntanan.
Despues por a bin constata cu minister di Enseñansa a bin admiti cu e ta usa placa di enseñansa pa droga. E cos ey ta masha lamentabel. Si e minister bisa cu e falta placa, kiermen cu mester a haya mas placa ainda. E ora con por yega asina leu di usa placa di pueblo, placa cu mester bay pa enseñansa pa conferencia di droga.
Loke Dowers a indica cu den pasado e minister aki a indica cu pueblo no mester paga schoolgeld mas. Pueblo mester ta liber di haya enseñansa sin paga. A bin resulta cu e tambe ta un engaño cu tabata tin pa e pueblo y a laga tur cos manera e tabata. Pueblo ta sigui paga.
Awor aki loke ta nobo ta si bo ta manda incassobureau riba e hende humilde, ta hay’e confronta cun’e. Realmente awor aki ta creando e crisis social cu nan a bin ta promove tur e tempo ey. Pero loke ta mas importante pa nan, ta e promocion di e legalisacion di droga.
Si un asunto di droga ta algo di salud, pakico Minister di Enseñansa ta coy placa cu mester bay pa nos criaturanan, pone den esaki. Si nan ta bay legalisa un zetpil nobo, of un paracetamol, of un cos pa dolor, minister di enseñansa ta bay haci investigacion riba esaki? Minister di enseñansa ta usa placa pa introduci zetpil nobo? No.
Esaki ta responsabilidad di minister di salud. Con por ta posibel cu ta usando placa di enseñansa, no di ministerio di salud, pa bay promove legalisacion di droga na nos pais. Nos mester ta honesto. Esaki ta e capa, nunca e hendenan aki a papia den nan programa di gobernacion, riba medicina. Semper nan a papia con pa pone mas droga riba e pais aki. Mira con por desgracia yiunan di hende riba e pais aki door di dunanan droga.
Hopi di nan a mira e desaster cu droga ta causa, mira cuando degeneracion tin, mira cuanto maltrato di famia, cuanto abuso ta tumando luga. Por tende cu nan ta bati hende riba caya, cu pat’i cabra, kibramento di luga di hende, hortamento. Hopi di nan ta liga na e droga.
Awe ta bin bisa cu pasobra cu bosonan kier pa venena nos yiunan cu droga, ta bao di un capa di legalisacion di droga, ta bay papia riba droga medicinal, usando placa di enseñansa cu mester yuda nos criaturanan, hustamente pa nan keda for di droga, pa por duna nan droga.
E minister aki ta un berguensa pa enseñansa. Ta berguensa pa un hende cu tabata pretende di tabata un hende di tabata di iglesia di dios. Ta un berguensa asina aki ta sinta como minister y ta haciendo tipo di cosnan cu e ta haci.
Dios ta grandi y lo keda proteha nos yiunan contra di e mal hendenan aki. Esey no ta nifica cu nos por drumi. Manera cu Dios a bisa, nos tambe tin cu yuda nos mes pa e yuda nos. Pesey tin cu bay padilanti, saca man proteha nos comunidad, contra un minister manera cu nos a bin conoce awor aki. Un minister contra pueblo, contra enseñansa y pro maldad.
